Իրավաբանների համահայկական համաժողովը կբացվի Երևանում սեպտեմբերի 19-ին

Իրավաբանների համահայկական համաժողովը կբացվի Երևանում սեպտեմբերի 19-ին: Բացման հանդիսավոր արարողությունը տեղի կունենա ՀՀ կառավարության նիստերի դահլիճում:

Ինչպես «Նովոստի-Արմենիա» գործակալությանը տեղեկացրեցին ՀՀ սփյուռքի նախարարության մամուլի ծառայությունից, նման որոշում է ընդունվել ՀՀ սահմանադրական դատարանի նախագահ Գագիկ Հարությունյանի գլխավորությամբ տեղի ունեցած համաժողովի կազմկոմիտեի նիստի ընթացքում:

Նիստին ներկա էին ՀՀ սփյուռքի նախարար Հրանուշ Հակոբյանը և ՀՀ արդարադատության նախարար Գևորգ Դանիելյանը, ինչպես նաև ներկայացուցիչներ ՀՀ փաստաբանների պալատից, Հայաստանի իրավաբանների միությունից և Երևանի պետական համալսարանից:

Քննարկման հիմնական թեման էր համաժողովի կազմակերպման հետ կապված հարցերը, թեմատիկան, ծրագիրը:

Մասնավորապես՝ թեմատիկան վերաբերելու է իրավունքի ընկալմանը, օրենսդրական զարգացումներին, մարդու իրավունքների պաշտպանության եվրոպական չափանիշներին, իրավագիտության առջև ծառացած հիմնախնդիրներին:

Համաժողովի նախօրեին` սեպտեմբերի 18-ին, ՀՀ սփյուռքի նախարարությունում, կկազմակերպվի Երևան ժամանած համաժողովի մասնակիցների ընդունելություն:

Համաժողովի բացման օրը՝ սեպտեմբերի 19-ին, տեղի կունենա լիագումար մեկ նիստ, որից հետո մասնակիցները կբաժանվեն խմբերի և կայցելեն Սահմանադրական դատարան, Արդարադատության նախարարություն, ԵՊՀ, Փաստաբանների պալատ, որտեղ կշարունակվի քննարկումը:

Համաժողովի ընթացքում ծրագրվում է ձևավորել Հայ իրավաբանների միջազգային ընկերակցություն:

Համաժողովի ընթացքում նախատեսվում են մասնակիցների համար ընդունելություններ ՀՀ Ազգային ժողովում և ՀՀ վարչապետի կողմից: Մասնակիցները կլինեն Մայր Աթոռ Սուրբ Էջմիածնում, Մատենադարանում:-0-