Հայաստանում ամենատարածված անուններն են Անին և Նարեկը

Հայաստանում նորածիններին տրվող  ամենատարածված անուններն են Անին և Նարեկը, ուրբաթ «Նովոստի-Արմենիա» գործակալությանը հայտնեցին Ազգային վիճակագրական ծառայությունից:

ԱՎԾ տվյալներով՝ 2009 թ,-ի հունվարից մայիս ընկած ժամանակահատվածում Հայաստանում ծնվել է 7475 աղջիկ և 8688 տղա։

«290 աղջիկների տրվել է Անի անունը, իսկ 421 տղա ստացել են Նարեկ անունը»,- ասվում է հաղորդագրությունում։ 2008 թվականին նորածինների ամենատարածված անունները եղել են Միլենան և Նարեկը։ ԱՎԾ տվյալներով՝ հաշվետու ժամանակհատվածում Միլենան երկրորդ տեղում է իր տարածվածությամբ (281 նորածին)։

Կանանց անունների շրջանում տարածված են նաև Էլենը (267), Մարիամը (248), Մանեն (233), Անահիտը (229), Աննան (194), Լիլիթը (173) և Մերին (173)։

Ինչ վերաբերում է տղամարդու անուններին, ապա Նարեկից բացի տարածված են նաև Դավիթ (394), Գոռ (266), Արման (243), Էրիկ (237), Տիգրան (183), Սամվել (171) և Արմեն (168) անունները։ -0-