Հայ մարմնակրթական ընդհանուր միության խաղերն առաջին անգամ կանցկացվեն Հայաստանում օգոստոսի 1-8-ը

ԵՐԵՎԱՆ, 31 հուլիսի. /Նովոստի-Արմենիա/. Հայ մարմնակրթական ընդհանուր միության խաղերն առաջին անգամ կանցկացվեն Հայաստանում օգոստոսի 1-8-ը, ուրբաթ լրագրողներին տեղեկացրեց հայկական սկաուտական ազգային շարժման ատենապետ Հրաչյա Շմավոնյանը։

Ըստ նրա՝ խաղերը կանցկացվեն 5 մարզաձևերով, որոնցից երկուսը թիմային են՝ ֆուտբոլ և բասկետբոլ, ինչպես նաև սեղանի թենիս, լող, շախմատ։

Խաղերին կմասնակցեն ավելի քան 500 մարզիկներ 15 տարածաշրջաններից և երկրներից, որտեղ գործում է Միությունը, մասնավորապես, Հայաստանից, Ավստրալիայից, ԱՄՆ-ից, Անգլիայից, Բուլղարիայից, Հունգարիայից, Եգիպտոսից, Իսրայելից, Լիբանանից, Կանադայից, Սիրիայից, Ֆրանսիայից, Իրանից։

«Հայ մարմնակրթական ընդհանուր միության խաղերն անցկացվում են չորս տարին մեկ անգամ, դրանք Միությունում ընդգրկված սպորտի սիրահարների մրցումներ են, որոնք միավորում են սփյուռքի երիտասարդությունը մարզական ոգու և «Հայ Դատի» գաղափարի շուրջ»,- ասաց Շմավոնյանը։

Նա տեղեկացրեց, որ միջոցառումները մեկնարկում են օգոստոսի 1-ին մայրաքաղաքի Հյուսիսային պողոտայից, որով երթով դեպի Հանրապետության հրապարակ կուղղվեն խաղերի բոլոր մասնակիցները։ Արդեն հրապարակում տեղի կունենա միջոցառման հանդիսավոր բացումն ու տոնական համերգ, որին ներկա կգտնվեն բարձրաստիճան պետական պաշտոնյաներ։

Խաղերի մասնակիցները բացի մրցումներից Հայաստանում իրենց գտնվելու ընթացքում կայցելեն Սևան, ինչպես նաև կլսեն «Հայ Դատի» թեմայով դասախոսություն, ինչից հետո հարգանքի տուրք կմատուցեն Ցեղասպանության զոհերի հիշատակին Ծիծեռնակաբերդ հուշահամալիրում։ 

«Խաղերի հաղթողներին կշնորհվեն մեդալներ և գավաթներ։ Ավելին, Հայաստանի Ազգային օլիմպիական կոմիտեի ղեկավար Գագիկ Ծառուկյանի նախաձեռնությամբ սահմանվել է հատուկ մրցանակ՝ փոխանցիկ գավաթ, որը Ծառուկյանի օժանդակությամբ կհանձնվի այն թիմին, որն ավելի շատ թվով մեդալներ կստանա մրցումների արդյունքում»,- ասաց Ծառուկյանը։

Խաղերի կազմակերպմանն աջակցել են տարբեր պետական կառույցներ և Հայատանի սպորտային ֆեդերացիաներ, ինչպես նաև ՀՀ Ազգային օլիմպիական կոմիտեն:

Սրանք արդեն ութերորդ խաղերն են, որոնք անցկացվում են Հայ  մարմնակրթական ընդհանուր միության կողմից։ Նախորդ խաղերն անցկացվել են Կանադայում, ԱՄՆ-ում, Ֆրանսիայում, Լիբանանում և Հունաստանում։

Հայ  մարմնակրթական ընդհանուր միությունը մարզական և սկաուտական կազմակերպություն է, որը հիմնվել է 1918 թվականին։ Այսօր Միությունը ներկայացված է 100 ստորաբաժանումներով աշխարհի 25 երկրներում և ունի ավելի քան 25 հազար անդամ։ -0-