Հուլիսի 23-29-ը Հարավային Կովկասի տարածաշրջանում հինգ երկրաշարժ է տեղի ունեցել

Հուլիսի 23-29-ը հայկական սեյսմիկ կայանները Հարավային Կովկասի տարածաշրջանում երեք բալ և ավելի ուժգնությամբ հինգ երկրաշարժ են գրանցել, հինգշաբթի «Նովոստի-Արմենիա» գործակալությանը տեղեկացրեցին ՀՀ սեյսմիկ պաշտպանության ազգային ծառայությունից:

Ինչպես նշվում է տեղեկատվության մեջ, հաշվետու ժամանակաշրջանում Հայաստանի տարածքում ստորգետնյա ցնցումներ չեն գրանցվել:

Հուլիսի 25-ին Իրան-Թուրքիա սահմանային գոտում, իրանական Սալմաս քաղաքից 32 կմ դեպի հյուսիս-արևմուտք, գրանցվել է 4-5 բալ ուժգնությամբ երկրաշարժ:

Հաջորդ օրը 5 բալ ուժգնությամբ երկրաշարժ է տեղի  ունեցել Թուրքիայի Կարս քաղաքից 27 կմ դեպի հարավ-արևելք:

Երրորդ երկրաշարժը տեղի է ունեցել հուլիսի 27-ին Վրաստանի տարածքում` Բարիսախո քաղաքից 26 կմ դեպի հարավ-արևելք, որի ուժգնությունն էպիկենտրոնային գոտում կազմել է 4 բալ:

Նույն օրը 3 բալանոց սեյսմիկ ցնցումներ են գրանցվել Վրաստանի Դմանիսի քաղաքից 24 կմ դեպի հյուսիս-արևելք և Ադրբեջանի Գյանջա քաղաքից 56 կմ դեպի հյուսիս-արևմուտք:-0-