Ռազմագերիների հարցով Ադրբեջանի շահարկումները ուղղված են ղարաբաղյան խնդրի բարդացմանը. Հայաստանի ԱԱԾ

ԵՐԵՎԱՆ, 30 հուլիսի. /Նովոստի-Արմենիա/. Ադրբեջանի շահարկումները հայ զինծառայող ռազմագերիների հարցով ուղղված են հայկական կողմի հետ հարաբերությունների սրմանը և ղարաբաղյան խնդրի բարդացմանը, ասվում է հինգշաբթի Հայաստանի Ազգային անվտանգության ծառայության տարածած հաղորդագրությունում։

«Ադրբեջանական որոշ կառույցներ  հետևողականորեն  ջանում են  առավելագույնս  լարել  հակամարտող կողմերի հարաբերությունները,  ստեղծել  բարոյահյոգեբանական  լարված մթնոլորտ, ինչն  անմիջականորեն  վտանգում է  միջազգային միջնորդների  ջանքերը  ղարաբաղյան  հարցի խաղաղ կարգավորման ուղղությամբ»,- ասվում է ԱԱԾ հաղորդագրությունում։

Ինչպես հիշեցնում է ԱԱԾ-ը, հուլիսի 15-ին  ադրբեջանական կողմին  գերի ընկած հայ ժամկետային  զինծառայողի հետ կապված փաստը առիթ է  տվել ադրբեջանական որոշ լրատվամիջոցներին հակահայկական  քարոզչության նոր ալիք բարձրացնելու, օրինակ, Ադրբեջանի ռազմական  ոմն  փորձագետ  կարծիք է հայտնել, թե այդ քայլին  զինծառայողին դրդել է «սովը և Եվրոպա տեղափոխվելու հեռանկարը»:

Ծառայության տվյալներով՝ փորձագետն իրեն իրավունք է վերապահել անգամ խորհուրդ տալ հայ զինվորներին` ադրբեջանական կողմն անցնել գումարտակներով և գնդերով, քանի որ այսպես ավելի հեշտ կլինի  նրանց Եվրոպա տեղափոխելը:

Միաժամանակ Հայաստանի ԱԱԾ-ը նշում է, որ վերջին տարիներին հայկական  կողմն են անցել և գերի հանձնվել ադրբեջանցի 8 զինվորներ, որոնցից 6-ը հետագայում  Միջազգային Կարմիր Խաչի  կոմիտեի և ՄԱԿ-ի  փախստականների գործերով Գլխավոր հանձնակատարի միջնորդությամբ տեղափոխվել են  երրորդ երկրներ,  իսկ մյուս երկուսը  դեռ Հայաստանում են  և հրաժարվում են վերադառնալ Ադրբեջան:

«Հայկական կողմը երբեք չի շահարկել կամ քաղաքականացրել, ինչը փորձում են իրականացնել ադրբեջանական «փորձագետները»,- հայտարարում է ԱԱԾ-ը։ -0-