ՀՀ էկոնոմիկայի նախարարը և Սերբիայի առևտրի և ծառայությունների նախարարը քննարկել են տնտեսական համագործակցության ընդլայնման ուղիները երկու երկրների միջև
ՀՀ էկոնոմիկայի նախարար Ներսես Երիցյանը և Սերբիայի Հանրապետության առևտրի և ծառայությունների նախարար Սլոբոդան Միլոսավլևիչը չորեքշաբթի քննարկել են տնտեսական համագործակցության ընդլայնման ուղիները երկու երկրների միջև, տեղեկացնում է Հայաստանի էկոնոմիկայի պաշտոնական կայքը։
Զրույցի ընթացքում քննարկվել է երկկողմ հետաքրքրություն ներկայացնող հարցերի լայն շրջանակ, կարևորվել է տնտեսության ոլորտում փոխշահավետ հարաբերությունների ընդլայնման ու խորացման անհրաժեշտությունը, մասնավորապես, տեղեկատվական տեխնոլոգիաների, գյուղատնտեսության, սննդամթերքի արտադրության, դեղագործության, զբոսաշրջության և այլ ոլորտներում:
Նախարարները նաև կարծիքներ են փոխանակել համատեղ ծրագրերի կազմակերպման հնարավորությունների վերաբերյալ:
Երիցյանը և Միլոսավլևիչն ընդգծել են իրենց պատրաստակամությունը` աջակցել Հայաստանի և Սերբիայի միջև ձևավորվող առևտրատնտեսական հարաբերությունները խթանող ցանկացած նախաձեռնության:
«Հայաստանի և Սերբիայի ժողովուրդները ծանոթ չեն միմյանց մշակույթին, ազգային ավանդույթներին, առևտրային և գործարար հնարավորություններին: Այդ իսկ պատճառով անհրաժեշտ է ավելի խորը ուսումնասիրություններ կատարել և արդյունավետ փոխգործակցության համար լայն հնարավորություններ ստեղծել», - ասել է Սերբիայի առևտրի և ծառայությունների նախարարը:
Իր կողմից Ներսես Երիցյանը կարևորել է հետաքրքրություն ներկայացնող ոլորտների վերաբերյալ տեղեկատվության փոխանակումը։
Նախարարն առաջարկել է զբոսաշրջային օպերատորների, լրագրողների և գործարարների փոխայցելություններ կազմակերպել` համագործակցության հնարավորությունները տեղում ուսումնասիրելու համար:
Հանդիպման ավարտին կողմերը քննարկել են նաև առաջիկայում գործարար համաժողով կազմակերպելու հարցը: -0-
