ԵԱՀՄ Մինսկի խմբի համանախագահները նոր ձևաչափով ավելի մեծ ուշադրություն կդարձնեն Ղարաբաղի իշխանությունների հետ շփումներին. փորձագետ

ԵՐԵՎԱՆ, 29 հուլիսի. /Նովոստի-Արմենիա/. ԵԱՀԿ Մինսկի խմբի համանախագահները նորացված ձևաչափով ավելի մեծ ուշադրություն կդարձնեն Ղարաբաղի իշխանութոյւնների հետ շփումներին, չորեքշաբթի «Նովոստի» միջազգային մամուլի կենտրոնում ունեցած մամուլի ասուլիսի ժամանակ ասաց «Եվրոպական ինտեգրացիա» կազմակերպության ղեկավար Կարեն Բեքարյանը:

Սպասվում է, որ մինչև 2009 թ.-ի վերջը ղարաբաղյան հակամարտության կարգավորման ԵԱՀԿ Մինսկի համանախագահ Մեթյու Բրայզային կփոխարինի մել այլ դիվանագետ: Պաշտոնը լքելու իր մտադրության մասին հայտարարել է նաև ռուս համանախագահ Յուրի Մերզլյակովը:

«Համանախագահներն արդեն նոր ձևաչափով մեծ ուշադրություն կդարձնեն Ղարաբաղի իշխանությունների հետ շփումներին, հնարավոր բոլոր միջոցներով կցուցադրեն, որ Ղարաբաղը տեղյակ է բանակցային ողջ գործընթացին և նրանց հետ զուգահեռ բանակցություններ են ընթանում մինչև այն պահը, երբ Ստեփանակերտը կնստի բանակցությունների սեղանի շուրջ», - ասաց Բեքարյանը:

Նրա խոսքերով՝ բանակցային գործընթացին Ղարաբաղի միանալու ժամկետները կախված կլինեն ղարաբաղյան հակամարտության կարգավորման Մադրիդյան թարմացված սկզբունքների բովանդակությունից:

«Կարծում եմ, որ սկսզբի համար համանախագահները կընտրեն որևէ միջանկյալ դրույթ, բացառված չէ նույնիսկ, որ Ղարաբաղը ոչ միանգամից կհայտնվի բանակցությունների սեղանի շուրջ, սակայն ավելի ուշ Ղարաբաղի դերը միանգամից կտրուկ կբարձրանա», - կարծում է Բեքարյանը:

Միաժամանակ «Եվրոպական ինտեգրացիա» կազմակերպության ղեկավարը նշեց, որ մոտակա ամիսներին կողմերը կդառնան այլ փոփոխությունների ականատեսը, մասնավորապես, ԵՄ կառույցները՝ ի դեմս Եվրահանձնաժողովի պատվիրակության, ակտիվ աշխատանք կսկսեն Ղարաբաղի հետ:

Բեքարյանը հույս հայտնեց, որ Ղարաբաղ այցելելու մտադրություն ունեցող Հարավային Կովկասում ԵՄ հատուկ ներկայացուցիչ Պիտեր Սեմնեբին, ում մշտապես ինչ-ինչ հանգամանքներ էին խանգարում, կկարողանա վերջապես ենթադրաբար սեպտեմբեր-հոկտեմբեր ամիսներին հասնել Ստեփանակերտ:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-