Սերբիայի նախագահը երկօրյա պաշտոնական այցով կժամանի Հայաստան

ՀՀ նախագահ Սերժ Սարգսյանի հրավերով հուլիսի 28-ին երկօրյա պաշտոնական այցով Հայաստան կժամանի Սերբիայի Հանրապետության նախագահ Բորիս Տադիչը, տեղեկացնում է ՀՀ նախագահի մամուլի ծառայությունը։

«Նույն օրը ՀՀ Նախագահի նստավայրում տեղի կունենա բարձրաստիճան հյուրի դիմավորման պաշտոնական արարողությունը, որին կհաջորդի նախագահներ Սերժ Սարգսյանի և Բորիս Տադիչի առանձնազրույցը: Այնուհետև կկայանա պաշտոնական պատվիրակությունների ընդլայնված կազմով հանդիպումը, ապա Հայաստանի և Սերբիայի ղեկավարները հայտարարություն կանեն մամուլի համար»,- ասվում է երկուշաբթի մամուլի ծառայության տարածած հաղորդագրությունում։

Հայաստանի Հանրապետության նախագահի անունից ի պատիվ Սերբիայի նախագահի կտրվի պաշտոնական ճաշ:

Այցի շրջանակում Բորիս Տադիչը հանդիպում կունենա վարչապետ Տիգրան Սարգսյանի հետ, կհյուրընկալվի Ամենայն Հայոց Գարեգին Երկրորդ կաթողիկոսին:

Սերբիայի նախագահը կայցելի Մեծ եղեռնի հուշահամալիր, ծաղկեպսակ կդնի զոհերի հուշակոթողին, կլինի Հայոց ցեղասպանության թանգարանում, ծառ կտնկի Հիշատակի պուրակում:

Բորիս Տադիչը հարգանքի տուրք կմատուցի և ծաղկեպսակ կդնի նաև 1988թ. Սպիտակի ավերիչ երկրաշարժից հետո աղետյալ բնակչությանն օգնության շտապող ավիավթարից զոհված հարավսլավացի օդաչուների հուշարձանին:

Սերբիայի նախագահը կայցելի նաև Մատենադարան:

Տադիչին ուղեկցող սերբական պատվիրակության կազմում են Սերբիայի արտաքին գործերի, առևտրի և ծառայությունների նախարարները, ովքեր հանդիպումներ կանցկացնեն իրենց հայ գործընկերների հետ։

Սերբիայի նախագահը կմեկնի Հայաստանից հուլիսի 29-ին։ -0-