Արտ-կուրատորների չորրորդ ամառային դպրոցը Հայաստանում կանցկացվի հուլիսի 27-ից օգոստոսի 2-ը
ԵՐԵՎԱՆ, 23 հուլիսի. /Նովոստի-Արմենիա/. Արտ-կուրատորների չորրորդ ամառային դպրոցը Հայաստանում կանցկացվի հուլիսի 27-ից օգոստոսի 2-ը, հինգշաբթի «Նովոստի» միջազգային մամուլի կենտրոնում հայտարարեց Արվեստի քննադատների ազգային ասոցիացիայի նախագահ, ամառային սեմինարների ծրագրի ղոկավար Նազարեթ Կարոյանը։
«Ամառային դպրոցի նպատակը արտ-կուրատորներին, քննադատներին և արվեստի ներկայացուցիչներին միավորելն է, ինչը հնարավորություն կտա ոչ միայն քննարկել ոլորտի արդիական հարցերը, այլև ձևավորել աշխարհում արվեստի քննադատների յուրահատուկ ցանց»,- ասաց Կարոյանը։
Նրա խոսքերով՝ տվյալ ցանցը միավորում է արվեստի հայտնի պրոֆեսորների, տեսաբանների և քննադատների աշխարհի տարբեր երկրներից։
«Ամառային դպրոցի ծրագիրը ստեղծվում էր որպես արվեստի կուրատորների և քննադատների շփման և արդյունավետ երկխոսության հաստատման, ինչպես նաև որպես հայկական արվեստը միջազգային հանրությանը ներկայացնելու հնարավորություն»,- ասաց Կարոյանը։
Նա նշեց, որ ամառային դպրոցին կմասնակցեն մասնագետներ Հայաստանից, Մեծ Բրիտանիայից, Հունգարիայից, Սերբիայից, Թուրքիայից և Վրաստանից։
Ինչպես նշեց պատմաբան-արվեստագետ, Կահիրեի Ամերիկյան համալսարանի դասախոս, ամառային սեմինարների համակարգող Անժելա Հարությունյանը, ամառային դպրոցի մասնակիցները կլսեն արվեստի, այդ թվում՝ հայկական արվեստի պատմության դասընթաց, կմասնակցեն կլոր սեղանների և քննարկումների, կանցկացնեն հրապարակային շնորհանդեսներ, ինչպես նաև կայցելեն արվեստի հայ գործիչների արվեստանոցները։
Արվեստի քննադատների ազգային ասոցիացիան ստեղծվել է 2005 թ.-ին: Կազմակերպությունում ընդգրկված են արվեստի տասը քննադատներ Հայաստանից: Ասոցիացիայի հիմնական խնդիրն է Հայաստանում արվեստի քննադատության զարգացումը, հասարակությունում արվեստի քննադատների դերի բարձրացումն ու համապատասխան հանրային կարծիքի ձևավորումը:
2006 թվականից ասոցիացիան մշակել և ներդրել է արտ-կուրատորների միջազգային ամառային դպրոցի գաղափարը, որին հայ փորձագետներից բացի մասնակցում են նաև մասնագետներ աշխարհի տարբեր երկրներից, այդ թվում՝ հետխորհրդային տարածքի երկրներից, Եվրոպայից, ինչպես նաև Թուրքիայից, Նոր Զելանդիայից, Կանադայից, Իսլանդիայից։ -0-
