ԵՐԵՎԱՆ, 22 հուլիսի. /Նովոստի-Արմենիա/. Հայաստանի ապրանքաշրջանառության ոլորտում ստվերային տնտեսության մակարդակը 2009 թվականի առաջին կիսամյակում կրճատվել է գրեթե 16 տոկոսով, չորեքշաբթի լրագրողներին հայտնեց ՀՀ վարչապետ Տիգրան Սարգսյանը։
Նա նշեց, որ ներկայում ստվերային տնտեսության մակարդակը Հայաստանում գնահատվում է շուրջ 40 տոկոս, ընդ որում հիմնական ստվերը գտնվում է ներքին տնտեսությունում։
«Սակայն արտաքին առևտրաշրջանառության ծավալի ցուցանիշը Հայաստանում առաջին կիսամյակում 2008 թվականի նույն ցուցանիշի համեմատ չի կրճատվել, ավելին, նկատելի են նույնիսկ աճի միտումներ, ինչը ՀՆԱ և արտաքին տրանսֆերների ծավալի կրճատման պայմաններում վկայում է ստվերային հատվածի կրճատման մասին»,- ասաց Սարգսյանը։
Նրա խոսքերով, արտաքին ապրանքաշրջանառության աճը պայմանավորված է այն գործոնով, որ հաշվետու ժամանակահատվածը ստվերային շրջանառության մակարդակը հաջողվեց կտրուկ կրճատել, առաջին հերթին հսկիչ դրամարկղային մեքենաների ներդրման հաշվին։
Միաժամանակ նա նշեց հայտնի փաստն այն մասին, որ ՀԴՄ-ները դեռ չեն կիրառվում ամենուրեք, իսկ տեղադրված ՀԴՄ-ները ցույց չեն տալիս ողջ ծավալները։
«Սակայն նույնիսկ նման պայմաններում մենք կարող ենք ասել, որ ստվերային շրջանառությունը ապրանքաշրջանառության ոլորտում կրճատվել է գրեթե 16 տոկոսով, քանի որ եթե ՀՆԱ-ն կրճատվել է 16 տոկոսով, ապա ապրանքաշրջանառությունն աճել է, նշանակում է, որ կրճատումը հնարավոր է դարձել կանխել ստվերային հատվածի բացահայտման շնորհիվ։ Եվ այստեղ էլ դեռ մեծ ներուժ կա»,- ասաց Սարգսյանը։
Օպերատիվ վիճակագրական տվյալների համաձայն՝ Հայաստանի ՀՆԱ-ն 2009թ.-ի հունվար-հունիս ամիսներին կրճատվել է 16,3 տոկոսով։ ՀՀ ազգային վիճակագրական ծառայության տվյալներով, ՀՆԱ ծավալը կազմել է 1119,4 մլրդ դրամ (3216,2 մլն դոլար)։
Միաժամանակ 2009 թվականի հունիսին հաշվարկված ՀՆԱ ծավալը 39,7 տոկոսով գերազանցել է նախորդ ամսվա ցուցանիշը։ -0-
