«Գրքարվեստ» հանրապետական երկրորդ մրցույթի հաղթողների պարգևատրումն անցկացվեց ՀՀ մշակույթի նախարարությունում

«Գրքարվեստ» հանրապետական երկրորդ մրցույթի հաղթողների պարգևատրման արարողությունը կազմակերպվել էր ՀՀ մշակույթի նախարարությունում:

Ինչպես նշեց ՀՀ մշակույթի նախարարության հրատարակչական գործի գործակալության պետ Էդուարդ Միլիտոնյանը, Հայաստանում անցկացվող հրատարակիչների մրցույթի արդյունքներն արդեն երկրորդ անգամ ամփոփվեցին մայիսի վերջին։

«Մրցույթի կազմակերպումն ուղղված է Հայաստանում գրահրատարակչության որակի բարձրացմանը, գրքարվեստի զարգացմանը, հրատարակիչների միջև համագործակցության և մրցունակության խթանմանը»,- ասաց Միլիտոնյանը։

Նրա խոսքերով, մրցույթին ներկայացվել է 32 գիրք, որից պրոֆեսիոնալ ժյուրին գաղտնի քվերակության միջոցով սահմանել է 21 հրատարակություն յոթ անվանակարգում՝ «Իմ Հայրենիքը», «Մեր ժամանակակիցը», «Արվեստի գիրք», «Հետաքրքիր ճակատագրի գիրքը», «Գիրք մանուկների համար», «Հրատարակվել է Հայաստանում», «Գլխավոր մրցանակ»։

«Այս մրցույթը ևս մեկ անգամ ցույց տվեց, որ հրատարակչական գործը Հայաստանում շարունակում է իր գոյությունը և զարգանում է արագ տեմպերով»,- ընդգծեց Հրատարակչական գործի գործակալության պետը։

Միլիտոնյանը հայտնեց նաև, որ երկու գիրք՝ Գագիկ Բաղդասարյանի «Երևան» ալբոմը, որը հաղթեց «Հրատարակվել է Հայաստանում» անվանակարգում, և Վան Խաչատուրի «Գույնը 4-19-րդ դարերի հայ ճարտարապետությունում», ներկայացվել են ԱՊՀ երկրների «Գրքարվեստ» միջազգային մրցույթին և առաջին աստիճանի դիպլոմի են արժանացել։

ՀՀ մշակույթի փոխնախարար Դավիթ Մուրադյանն իր հերթին նշեց, որ մրցույթը 2012 թվականին հայ տպագրության 500-ամյակը նախանշող միջոցառումներից է։

«Մեր խնդիրն է պահպանել մեր բազմադարյա տպագրական արվեստը և սերունդներին փոխանցել դրա լավագույն ավանդույթները»,- ասաց Մուրադյանը։ -0-