ԵՐԵՎԱՆ, 22 հուլիսի. /Նովոստի-Արմենիա/. Հրազդան ՋԷԿ-ի կենտրոնական վերանորոգման արտադրամասի կռունկավար, 49-ամյա Ռ. Ամյանը զոհվել է կռունկի խցիկից ընկնելու հետևանքով, հաղորդում է ՀՀ ԱԻՆ Փրկարար ծառայությունը:
Տեղեկատվության համաձայն՝ դեպքի մասին ահազանգը ստացվել է հուլիսի 21-ին Կոտայքի մարզից:
Ողբերգության պատճառները դեռևս հայտնի չեն:
Հունիսի 16-ին Հրազդանի ՋԷԿ-ում տեղի էր ունեցել ևս մեկ պատահար, երբ չինական «ՆՐՍՍ-3» ՍՊԸ-ի մասնագետերի կողմից հինգերորդ էներգաբլոկի ծխնելույզի վրա իրականացվող աշխատանքների ժամանակ շրջվել էր շինհրապարակը, ինչի հետևանքով 26 մ բարձրությունից չորս չինացի աշխատողներ ընկել և զոհվել էին:
Հրազդանի ՋԷԿ-ը Ռուսաստանի սեփականությանն է փոխանցվել Հայաստանի պետական 31 միլիոն դոլարի պարտքի մի մասը մարելու համար: 2006 թ.-ին Հայաստանի Հանրապետության կառավարության և «Գազպրոմ» ԲԲԸ-ի միջև ստորագրվել է համաձայնագիր, համաձայն որի՝ «ՀայՌուսգազարդ» ՓԲԸ-ն ձեռք է բերում Հրազդանի ՋԷԿ-ի հինգերորդ էներգաբլոկի ակտիվները՝ նրա շինարարությանն և արդիականացմանն ուղղված աշխատանքներն ավարտելու պարտավորությամբ:
Մրցակցային հիմքի վրա շինմոնտաժային աշխատանքների հիմնական կապալառու է ընտրվել է «Ջերմաէներգաշինմոնտաժ» թիվ 3 տրեստը (ՉԺՀ), որը միաժամանակ ապահովում է անհրաժեշտ բոլոր նախահաշիվային և ծախսվող նյութերի մատակարարումը:-0-
