ՀՀ սփյուռքի նախարարը սփյուռքի երիտասարդ ներկայացուցիչների հետ քննարկել է ազգային մշակույթի պահպանման հարցեր

ՀՀ սփյուռքի նախարար Հրանուշ Հակոբյանը Մարսել քաղաքի Ֆրանսիայի երիտասարդական միության ներկայացուցիչների, «Արաքս» ու «Սասուն» պարախմբի անդամների հետ քննարկել է սփյուռքում ազգային մշակույթի պահպանման հարցերը, հաղորդում է ՀՀ սփյուռքի նախարարության մամուլի և կապի վարչությունը:

Ինչպես նշվում է տեղեկատվության մեջ, պարախմբերը Հայստանում են գտնվում սփյուռքյան համայնքներում առաջիկա հյուրախաղերից առաջ պարային վարպետության դասեր ստանալու, «Արի տուն» ծրագրին մասնակցելու համար:

Պատվիրակները նախարարին են ներկայացրել Հայաստանից ստացած իրենց տպավորությունները` արձանագրելով այն դրական փոփոխությունները, որոնք ակնհայտ էին Հայաստան կատարած իրենց նախորդ այցելությունների համեմատ:

Հյուրերը կարևորել են Հայաստանում զբոսաշրջության զարգացման և բիզնեսի ոլորտում սփյուռքահայերի կողմից ներդրուներ կատարելու համար անհրաժեշտ պայմանների բարելավումը: Խոսելով ազգային մշակութի պահպանման մասին` նրանք նշել են, որ «չափազանց կարևոր է, որ ազգային մշակութը մնա իր բարձունքում և լինի օրինակ Սփյռւռքի համար, որպեսզի նրա ներկայացուցիչները կարողանան պահպանել իրենց ազգայինը, սնվեն հայկական մշակույթից և այն փոխանցեն երիտասարդներին»:

ՀՀ սփյուռքի նախարար շնորհակալություն է հայտնել երիտասարդական միության ներկայացուցիչներին Ֆրանսիայում ազգային մշակույթը, հայի ոգին և ինքնությունը բարձր պահելու, ինչպես նաև «Արաքս» և «Սասուն» պարախմբի անդամներների այցելությունը Հայաստան կազմակերպելու առիթով:

«Մարդիկ տարբեր են, ունեն տարբեր մտածելակերպ, տարբեր հայացքներ, սակայն Հայրենիքի հզորացման, պատմական, մշակութային և հոգևոր արժեքների պահպանման հարցում մենք պետք է լինենք միասին և համախմբված», - նշել է նախարարը:

Նախարարը հյուրերին կոչ է արել սրտում մշտապես պահել երեք կարևորագույն պատգամ` վերադարձ Հայրենիք, պահպանել հայ մշակույթը և որ միշտ հիշեն և գործեն այն սկզբունքով, որ Հայաստանը համայն հայության Հայրենիքն է:-0-