Հայ քաղաքագետը հայ-թուրքական հարաբերությունների շուտափույթ բարելավման հույս ունի
ԵՐԵՎԱՆ, 20 հուլիսի. /Նովոստի-Արմենիա/. Ռազմավարական և ազգային հետազոտությունների հայկական կենտրոնի տնօրեն Ռիչարդ Գիրագոսյանը հայ-թուրքական հարաբերությունների շուտափույթ բարելավման հույս ունի։
«Հայ-թուրքական հարաբերությունների բարելավման գործընթացն ավելի արագ է ընթանում, քան ղարաբաղյան հակամարտության կարգավորման ընթացքը»,- երեքշաբթի լրագրողներին ասաց Գիրագոսյանը՝ խոսելով Հայաստանի համար կարևոր խնդիրների լուծման հեռանկարների մասին։
Այս առիթով նա նշեց, որ Ռուսաստանն ու ԱՄՆ-ն հորդորում են Թուրքիային՝ շուտափույթ բացել Հայաստանի հետ սահմանը։
Փորձագետը նշեց, որ թեև հայ-թուրքական սահմանն առայժմ բաց չէ, բայց «արդեն բաց են մարդկային մտքի սահմանները», ինչի վկայությունն է բավականին ակտիվ համագործակցությունը հայկական և թուրքական մտավորականության ներկայացուցիչների միջև Հայոց ցեղասպանության հարցի շուրջ։
Հայ-թուրքական հարաբերությունների բարելավման հույս հայտնելով՝ Գիրագոսյանը նշեց, որ ամեն ինչ կախված է թուրքական կողմից և նրանից, թե ինչ ապագա է այն իր համար ցանկանում։
Քաղաքագետը հույս հայտնեց նաև, որ աշնանը Հայաստանի նախագահ Սերժ Սարգսյանը կմեկնի Թուրքիա՝ հայկական և թուրքական հավաքականների ֆուտբոլային խաղը դիտելու։
Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
