ԵՐԵՎԱՆ, 21 հուլիսի. /Նովոստի-Արմենիա/. Հայտնի կանադահայ դերասանուհի, կինոռեժիսոր Ատոմ Էգոյանի կինը՝ Արսինե Խանջյանը, աշխատում է «Պիկասոյի կանայք» նոր ներկայացման վրա: Այս մասին դերասանուհին տեղեկացրեց երեքշաբթի հրավիրված մամուլի ասուլիսի ժամանակ:
Նրա խոսքերով, չնայած Պաբլո Պիկասոն շատ կանայք է ունեցել, ներկայացումը պատմում է նրանցից միայն ութի կյանքի մասին:
«Ներկայացման մեջ Պիկասոյի կերպարը գոյություն չունի: Սցենարի համաձայն՝ գործողությունները տեղի են ունենում նրա մահից հետո», - ասաց դերասանուհին:
Նա նաև տեղեկացրեց, որ ամենայն հավանականությամբ ներկայացման պրեմիերան տեղի կունենա 2010թ.-ին Կանադայում, և բացառված չէ, որ հետագայում ներկայացումը ցուցադրվի նաև Հայաստանում:
Խանջյանը պատմեց նաև իր հայտնի ամուսնու ստեղծագործական ծրագրերի մասին՝ տեղեկացնելով, որ Էգոյանն այժմ աշխատում է « Chloe» անվանումով նոր ֆիլմի վրա:
«Ֆիլմը էկրանների վրա կհայտնվի 2010թ.-ին, և հնարավոր է՝ ներկայացվի Երևանում «Ոսկե ծիրան» յոթերորդ փառատոնին», - ասաց դերասանուհին:
Նա նշեց, որ ֆիլմը ֆրանս-ամերիկյան համատեղ արտադրության է, և գլխավոր դերում հանդես է գալիս հայտնի հոլիվուդյան դերասանուհի Ջուլիանա Մուրը:-0-
