Հայոց ցեղասպանության թեմայով ֆիլմեր նկարահանող կինոռեժիսորները պետք է նոր ոճ գտնեն, որն ավելի շատ է համապատասխանում ժամանակակից կինոյի պահանջներին, կարծում է հայտնի կանադահայ դերասանուհի Արսինե Խանջյանը՝ հայտնի կինոռեժիսոր Ատոմ Էգոյանի կինը:
«Ժամանակակից կինեմատոգրաֆում արդեն ընդունված չէ ներկայացնել պատմությունը իրադարձությունների ժամանակագրության տեսքով, անհրաժեշտ են նոր ձևեր, թեմայի մատուցման միջոցներ: Անհրաժեշտ է գտնել ոչ միայն հայ, այլև օտարերկրյա հանդիսատեսին հետաքրքրելու միջոց», - երեքշաբթի մամուլի ասուլիսի ժամանակ ասաց Խանջյանը:
Խանջյանի խոսքերով, կարևոր է նաև ներկայացնել Ցեղասպանության խնդիրը ոչ միայն որպես հայ ժողովրդի, այլև ողջ մարդկության խնդիր, քանի որ «ցեղասպանություններ իրականացվել են բոլոր ժամանակներում, և ոչ մի ժողովուրդ ապահովագրված չէ դրանից»:
Դերասանուհին ավելացրեց նաև, որ իր համար հարցական է մնում, թե ինչու՞ է Ցեղասպանությունն ավելի հաճախ թեմա դառնում սփյուռքում բնակվող կինոռեժիսորների կողմից ֆիլմերի նկարահանման համար:
«Չգիտես ինչու, Հայաստանում այդ թեման մեծ հետաքրքրություն չի առաջացնում: Ինչու՞, չեմ կարող հասկանալ», - ասաց Խանջյանը:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը։-0-
