Հայաստանը կշարունակի եվրոպական ընտանիքին մերձենալու արտաքին քաղաքականության իր կուրսը

ԵՐԵՎԱՆ, 20 հուլիսի. /Նովոստի-Արմենիա/. Հայաստանը կշարունակի եվրոպական ընտանիքին մերձենալու արտաքին քաղաքականության իր կուրսը, Եվրամիության «Եռյակի» պատվիրակության հետ բանակցություններից հետո երկուշաբթի ճեպազրույցի ժամանակ հայտարարեց ՀՀ արտգորնախարար Էդվարդ Նալբանդյանը։

Եվրոպական Միության Եռյակի պատվիրակությունը Հայաստան է ժամանել երկուշաբթի օրը, Շվեդիայի Թագավորության արտաքին գործերի նախարար Կառլ Բիլդտի գլխավորությամբ։ Հանդիպման ընթացքում նախատեսված էր ԵՄ «Եռյակի»  հանդիպումը Հայաստանի նախագահ Սերժ Սարգսյանի և արտաքին գործերի նախարար Էդվարդ Նալբանդյանի հետ։

«Հայաստանը կշարունակի եվրոպական ընտանիքին մերձենալու արտաքին քաղաքականության իր կուրսը և մտադիր է տվյալ ուղղությամբ իրականացնել անհրաժեշտ բոլոր քայլներն ու բարեփոխումները»,- ասաց նախարարը։

Նա նշեց, որ բանակցությունների ընթացքում քննարկվեց Հայաստան-ԵՄ հարաբերություններին առնչվող, համագործակցության ընդլայնման և խորացման, ինչպես նաև տվյալ ուղղությամբ իրականացված համատեղ քայլերին ուղղված հարցերի լայն շրջանակ։

«Հայաստան-ԵՄ համագործակցությունը բազմակողմանի է և բազմազան։ Մենք համագործակցում ենք տարբեր ձևաչափերով և տարբեր ծրագրերով, մասնավորապես՝ գործընկերության և համագործակցության, եվրոպական հարևանության և արևելյան գործընկերութոյան քաղաքականության ծրագրերով»,- ասաց Նալբանդյանը։

Նախարարը հիշեցրեց, որ 2008 թվականի նոյեմբերին Հայաստանի նախագահ Սերժ Սարգսյանի՝ Բրյուսել կատարած այցի ընթացքում ձեռք բերված պայմանավորվածություներին համապատասխան, մինչև վերջերս համագործակցության գործող ձևաչափերին ավելացավ ևս մեկը՝ ԵՄ խորհրդատվական խմբի ներկայությունը Հայաստանում, որը կնպաստի բարեփոխումների իրականացմանը օրենսդիր, գործադիր և դատական ոլորտներում։

Հայաստանի և ԵՄ-ի միջև գործում է քաղաքական երկխոսություն վարելու մշտական և գործուն մեխանիզմ, համագործակցում են ՀՀ Ազգային ժողովն ու Եվրախորհրդարանը: Հայաստանի տարբեր գերատեսչություններ արդյունավետ կերպով համագործակցում են Եվրահանձնաժողովի տարբեր ոլորտների տնօրինությունների հետ:

«Մենք շնորհակալ ենք Եվրամիությանը և առանձին անդամ երկրներին Հայաստանի զարգացմանն օժանդակելու համար»,- ասաց Նալբանդյանը։

Նա նշեց, որ քննարկումների օրակարգում անդրադարձ կատարվեց նաև հայ-թուրքական հարաբերությունների կարգավորմանը, և տվյալ համատեքստում ԱԳՆ ղեկավարը շնորհակալություն է հայտնեց Եվրամիությանը տվյալ հարցում աջակցելու համար։

Նա ներկայացրեց նաև ղարաբաղյան հակամարտության կարգավորման ընթացքը, Հայաստանի և Ադրբեջանի նախագահների՝ երկու օր առաջ անցկացված հանդիպման արդյունքները և պաշտոնական Երևանի սկզբունքային դիրքորոշումն այն մասին, որ խնդիրները հնարավոր է լուծել միայն խաղաղ ճանապարհներով։

Հանդիպման ընթացքում նշվեց նաև հակամարտության կարգավորման անհրաժեշտությունը միջազգային նորմերի և սկզբունքների, հատկապես ժողովրդի ինքնորոշման իրավունքի, տարածքային ամբողջականության և ուժի չկիրառման հիման վրա։ -0-