«EXPO-RUSSIA ARMENIA» ռուսական երկրորդ արդյունաբերական ցուցահանդեսը կանցկացվի Երևանում հոկտեմբերի 29-31-ը:
Ինչպես երկուշաբթի «Նովոստի-Արմենիա» գործակալությանը տեղեկացրեցին «Զարուբեժ-Էքսպո» ԲԲԸ-ից, ցուցադրությունը կբացի ՀՀ նախագահ Սերժ Սարգսյանը:
«Ցուցահանդեսի նպատակն է զարգացնել Ռուսաստանի և Հայաստանի միջև տնտեսական, գիտատեխնիկական, մշակութային համագործակցությունը, հաստատել և ամրապնդել կապերը երկրների միջև, զարգացնել համատեղ բիզնեսը, առևտրատնտեսական և ներդրումային հարաբերությունները», - ասվում է տեղեկատվության մեջ:
Ցուցահանդեսին կներկայացվեն ավելի քան 70 ռուսական ընկերություններ, որոնք գործում են այնպիսի ոլորտներում, ինչպիսիք են նոր տեխնոլոգիաները էներգետիկան, մեքենաշինությունը, մետաղագործությունը, բարձր տեխնոլոգիաները, նանոտեխնոլոգիաները, շինարարությունը, ավտոմոբիլային արդյունաբերությունը, հեռահաղորդակցությունը և կապը, նավթագազային արդյունաբերությունը, գյուղատնտեսությունը և շինարարական տեխնիկան, բժշկությունը և դեղագործությունը:
Ցուցահանդեսին կմասնակցեն այնպիսի ռուսական ընկերություններ, ինչպիսիք են «ՌԵՈՒ» ԲԲԸ-ն, «Գոռնիյե մաշինի» ՓԲԸ-ն, Յարոսլավլի էլեկտրամեքենագործական «Էլդին» ԲԲԸ գործարանը, Հյուսիսկովկասյան աէրոգեդեզային ձեռնարկությունը, Մակերեսի և վակուումի հատկանիշների ուսումնասիրության գիտահետազոտական կենտրոնը, «Կրիստալ» ԲԲԸ քիմգործարանը, Բիոօրգանական քիմիայի ինստիտուտը:
Ցուցահանդեսի շրջանակներում կանցկացվի նաև «Ռուսաստան-Հայաստան. Տնտեսական համագործակցություն» կոնֆերանսը, ինչպես նաև կկազմակերպվեն հանդիպումներ նախարարությունների, գերատեսչությունների ներկայացուցիչների հետ, այցելություններ Հայաստանի առաջատար ձեռնարկություններ, կլոր սեղաններ:
Ցուցահանդեսի կազմակերպիչներն են «Զարուբեժ-Էքսպո» ԲԲԸ-ն և «Մուլտի գրուպ» կոնցեռնը:
Ցուցահանդեսին տեղեկատվական աջակցություն են ցուցաբերում ռուսական և հայկական ավելի քան 50 ԶԼՄ-ներ:
Ցուցահանդեսն անցակցվում է Ռուսաստանի և Հայաստանի նախարարությունների, գերատեսչությունների, ոլորտի միությունների աջակցությամբ:
«EXPO-RUSSIA ARMENIA» առաջին ռուսական ցուցահանդեսն անցկացվել է Երևանում 2008 թ.-ի հոկտեմբերի 31-ից նոյեմբերի 2-ը: Ցուցահանդեսին մասնակցում էին ավելի քան 60 ընկերություններ Ռուսաստանի 30 շրջաններից:
Ռուսաստանի և Հայաստանի միջև ապրանքաշրջանառությունը մոտեցել է 1 միլիարդ դոլարին: Ռուսաստանի և Հայաստանի միջև տնտեսական փոխգործակցության հեռանկարային բնագավառը էներգետիկան է: Վերջերս կողմերը քննարկում էին մասշտաբային նոր համատեղ նախագծերի իրագործման հնարավորությունները արդյունահանող և վերամշակող արդյունաբերության տարբեր հատվածներում, տրանսպորտի, հեռահաղորդակցության և կապի ոլորտներում:-0-
