Երևանի քաղաքապետը և հայաստանում Իրանի դեսպանը քննարկել են Երևանի և Թեհրանի միջև համագործակցության հարցեր

ԵՐԵՎԱՆ, 18 հուլիսի. /Նովոստի-Արմենիա/. Երևանի քաղաքապետ Գագիկ Բեգլարյանը և Իրանի Իսլամական Հանրապետության  արտակարգ և լիազոր դեսպան Ալի Ռեզա Սաղայանը ուրբաթ հանդիպման ընթացքում քննարկեցին Երևանի և Թեհրանի միջև համագործակցության հարցեր, տեղեկացնում է Երևանի քաղաքապետարանի պաշտոնական կայքը։

Ինչպես նշվում է հաղորդագրությունում, հանդիպմանը դեսպանը Գագիկ Բեգլարյանին փոխանցեց Թեհրանի քաղաքապետի շնորհավորական ուղերձը` վերջերս կայացած Երևանի քաղաքապետի ընտրություններում հաղթելու կապակցությամբ:

Կողմերը նշեցին, որ երկու պետությունների մայրաքաղաքների միջև համագործակցությունը դեռևս զիջում է միջպետական հարաբերություններին:

«Հայերը մեծ ներդրում ունեն մեր պետության հոգևոր, մշակութային կյանքում: Թեհրանում, Թավրիզում, ինչպես նաև Սպահանում բազմաթիվ կարևոր նշանակության շենքեր նախագծվել են հայ ճարտարապետների կողմից»,- նշեց  Ալի Ռեզա Սաղայանը:
 
Թեհրանում հզոր հայ համայնք կա, որն ունի  ավելի քան 500 տարվա պատմություն:

Դեսպանը հայտնեց, որ Երևանում վերջին շրջանում վերականգնվեց պարսկական Կապույտ մզկիթը, Թեհրանում նորոգվեցին հայկական եկեղեցիները:

«Այս ամենը խոսում է մեր երկու ժողովուրդների պատմամշակութային ընդհանրությունների մասին: Կարևոր է, որ քաղաքային տնտեսության և ենթակառուցվածքների տարբեր ոլորտներում համագործակցությունը խորանա»,-  ընդգծեց Երևանի քաղաքապետը՝ հրավիրելով իր իրանացի գործընկերոջը Երևան։

Երևանի քաղաքապետը նաև իր ցավակցությունները հայտնեց չորեքշաբթի տեղի ունեցած ողբերգական ավիավթարի կապակցությամբ։ Իր հերթին դեսպանն իր երախտագիտությունը հայտնեց հայկական կողմի արագ արձագանքի համար վթարից հետո։  -0-