ՌԴ, Հայաստանի և Ադրբեջանի նախագահների հանդիպումը կառուցողական է եղել. Պրիխոդկո

Ռուսաստանի, Հայաստանի և Ադրբեջանի նախագահներ Դմիտրի Մեդվեդևի, Սերժ Սարգսյանի և Իլհամ Ալիևի  հանդւպումը Մոսկվայում կառուցողական մթնոլորտում է անցել, հայտարարել է ՌԴ նախագահի օգնական Սերգեյ Պրիխոդկոն։

Առավոտյան առաջնորդները ներկա են եղել Ռուսաստանի նախագահի սահմանած մրցանակի համար ձիարշավին Մոսկվայի կենտրոնական ձիարշավարանում, իսկ այնուհետև շարունակել են շփումը եռակողմ ձևաչափով մոսկովյան ռեստորաններից մեկում։

«Ռուսաստանի, Հայաստանի և Ադրբեջանի նախագահների այսօրվա՝ թվով չորրորդ հանդիպման ընթացքում Մեդվեդևը հաստատեց Ռուսաստանի՝ որպես ԵԱՀԿ Մինսկի խմբի համանախագահի պատրաստակամությունը այսուհետ ևս գործադրել բոլոր ջանքերը ղարաբաղյան կարգավորման փոխընդունելի լուծումներ գտնելու ուղղությամբ»,- ասաց Պրիխոդկոն։

Երեք երկրների առաջնորդները քննարկեցին ղարաբաղյան հիմնախնդրի կարգավորման հետագա ուղիները։ «Կայացավ երկար և, մեր կողմի գնահատականով, շատ կառուցողական հանդիպում, որի ընթացքում շարունակվեց մի շարք բաց հարցերի քննարկումը»,- հայտնեց Պրիխոդկոն։

«Նախագահներ Սարգսյանը և Ալիևն իրենց երախտագիտությունը հայտնեցին Դմիտրի Մեդվեդևին՝ Հայաստանի և Ադրբեջանի դիրքորոշումների մերձեցման և Լեռնային Ղարաբաղի հակամարտության կարգավորմանն աջակցելու նրա ջանքերի համար»,- հավելեց երկրի ղեկավարի օգնականը։ -0-