Ամենայն Հայոց Գարեգին Երկրորդ Կաթողիկոսը շաբաթ օրը Մայր Աթոռ Սուրբ Էջմիածնում անցկացնում է Իրանում ավիավթարի զոհերի հոգեհանգստի արարողությունը:
Իրանում ավիավթարի արդյունքում զոհված Հայաստանի քաղաքացիների աճյունները Երևան կբերվեն հուլիսի 18-ին, «Նովոստի-Արմենիա» գործակալությանը հայտնեց Հայաստանում Caspian Airlines-ի ներկայացուցիչ Առլեն Դավուդյանը:
«Ինքնաթիռը, որը բերում է զոհվածների հարազատներին և ավիավթարում զոհված ՀՀ հինգ քաղաքացիների մասունքները, վայրէջք կկատարի «Զվարթնոց» միջազգային օդանավակայանում հուլիսի 18-ին տեղական ժամանակով ժամը 12:00-ին», - տեղեկացրեց Դավուդյանը:
Կառավարական հանձնաժողովի տվյալներով՝ հարազատներին կդիմավորեն ՀՀ ՔԱԳՎ պետ Արմեն Մովսիսյանը, Արմավիրի մարզպետը, Երևանի փոխքաղաքապետը, օպերատիվ շտաբի անդամները, եկեղեցու հոգևորականներ, այլ կառույցների ներկայացուցիչներ:
«Օդանավակայանի բեռնային համալիրում կկատարվի հոգեհանգստի արարողություն, ինչից հետո մասունքները կտեղափոխվեն հարազատների կողմից նշված հասցեներով», - ասվում է կառավարական հանձնաժողովի տեղեկատվության մեջ:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:
Փրկարարները գտել են չորեքշաբթի վթարի ենթարկված Տու-154-ի բոլոր երեք «սև արկղերը», սակայն դրանցից երկուսը խիստ վնասված են:-0-
