ԵՐԵՎԱՆ, 17 հուլիսի. /Նովոստի-Արմենիա/. Նախնական տվյալներով Իրանում ավիավթարի արդյունքում զոհված Հայաստանի քաղաքացիների աճյունները Երևան կբերվեն հուլիսի 18-ին, ուրբաթ «Նովոստի-Արմենիա» գործակալությանը հայտնեց Հայաստանում Caspian Airlines-ի ներկայացուցիչ Առլեն Դավուդյանը:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:
Փրկարարները գտել են չորեքշաբթի վթարի ենթարկված Տու-154-ի բոլոր երեք «սև արկղերը», սակայն դրանցից երկուսը խիստ վնասված են:
«Տվյալ պահին Հայաստանի քաղաքացիների մասունքներն արդեն նույնացված են, տեղադրված դագաղներում և փոխանցված Իրանում Հայաստանի դեսպանատանն ու Թեհրանի հայկական թեմին»,- ասաց Դավուդյանը:
Նրա խոսքերով, ներկայում տեղի է ունենում ընթացակարգերի իրավաբանական ձևակերպումը, և եթե ամեն ինչ առանց ձգձգումների անցնի, ապա աճյունները Caspian Airlines չվերթով Երևան կուղարկվեն արդեն շաբաթ օրը:
Նա նշեց, որ բոլոր ընթացակարգերն անցկացվում են արագացված կարգով, ինչը թույլ կտա հենց այդ չվերթով Երևան հասցնել նաև զոհված ուղևորների հարազատներին, որոնց վերադարձը անմիջականորեն կապված է աճյունների՝ Հայաստան ուղարկելու պատրաստության հետ:
Ավիաուղիների ներկայացուցիչը հայտնեց, որ լուծվել է նաև երկու տեխնիկների մասունքները հայրենիք հասցնելու հարցը, որոնց հետ որոշակի խնդիրներ էին ծագել, մասնավորապես հարազատները պետք է գտնվեին Իրանում, անալիզներ տային, ստանային մահվան վկայական, ինչպես նաև որոշ իրավաբանական փաստաթղթեր ձևակերպեին:
«Սակայն մեզ հաջողվեց կարգավորել նաև այդ խնդիրը, և նրանց մասունքները ևս Երևան կփոխադրվեն երևի թե վաղը»,- ասաց Դավուդյանը:
Իրանում ТУ-154 ինքնաթիռի վթարի զոհերի հարազատները մեկնել են ողբերգության վայր, որը գտնվում է իրանական Կազվին քաղաքի մերձակայքում։
Զոհվածների հարազատներին ուղեկցել են Թեհրանի թեմի առաջնորդը, Իրանի հայկական համայնքի և Հայաստանի դեսպանության ներկայացուցիչներ։
Կիրակի՝ հուլիսի 19-ին, Թեհրանի Սուրբ Սարգիս եկեղեցում կմատուցվի հոգեհանգստի կարգ, որը կմատուցի Թեհրանի թեմի առաջնորդ Սեպուհ արքեպիսկոպոս Սարգսյանը։
Ամենայն հայոց Գարեգին Բ-ը կաթողիկոսը շաբաթ Սբ. Էջմիածնի առաջնորդարանում հոգեհանգստի արարողություն կանցկացնի ավիավթարի զոհերի համար: -0-
