Իրանի իշխանությունները շարունակում են Իրանում ՏՈՒ-154-ի ավիավթարի հետևանքով զոհվածների մարմինների նույնականացման աշխատանքները, «Նովոստի-Արմենիա» գործակալությանը տեղեկացրեց ՀՀ քաղաքացիական ավիացիայի գլխավոր վարչության մամուլի քարտուղար Նելլի Չերչինյանը:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:
Մամուլի քարտուղարի խոսքերով՝ այս գործընթացի, ինչպես նաև ՀՀ զոհված քաղաքացիների մարմինները հայրենիք ուղարկելու հնարավորության հետ կապված նորությունները կարող են հայտնվել օրվա ընթացքում:
Չերչինյանը տեղեկացրեց, որ նախօրեին Բոյինգ-747 ինքնաթիռով Երևանից Իրան են մեկնել զոհվածների 53 հարազատները, որոնցից 17-ը ՀՀ քաղաքացիներ են:
Նրա խոսքերով՝ ավիավթարի զոհերի հարազատներին ուղեկցել է ՔԱԳՎ թռիչքային ստանդարտների վարչության մասնագետ Սինար Սահակյանը:
Նա նաև հաստատել է, որ Միջպետական ավիացիոն կոմիտեի առաջարկով՝ ավիավթարի պատճառների ուսումնասիրմանն ուղղված աշխատանքներին կմասնակցի ՔԱԳՎ թռիչքային անվտանգության գլխավոր մասնագետ Արմեն Սիմոնյանը:-0-
