Ղարաբաղյան հարցում միջնորդների առաջարկած զիջումները սպառնալիքի տակ են դնում հայ ժողովրդի անվտանգությունը Հայաստանում և ԼՂՀ-ում, հինգշաբթի մամուլի ասուլիսի ժամանակ ասաց ՀՅԴ Գերագույն մարմնի ներկայացուցիչ Արմեն Ռուստամյանը:
Դաշնակցությունը ծրագրում էր բողոքի ակցիա անցկացնել Ղարաբաղյան կարգավորման գործընթացի շուրջ իրադարձությունների առնչությամբ, մասնավորապես, ՌԴ, ԱՄՆ և Ֆրանսիայի նախագահների վերջին հայտարարության, որում ասվում է, որ Երևանին ու Բաքվին կներկայացվի Լեռնային Ղարաբաղի հարցով վերջին առաջարկությունների տարեբրակը: Սակայն ակցիան հետաձգվեց՝ Իրանում Caspian Airlines ավիաընկերության Թեհրան-Երևան չվերթն իրականացնող Տու-154 ինքնաթիռի վթարի ենթարկվելու պատճառով:
«Մենք չենք հրաժարվում ակցիան անցկացնելուց, քանի որ ժամանակը պահանջում է չձգձել գործընթացը, սակայն ծրագրում ենք այն մեկ այլ ձևաչափ տեղափոխել, մասնավորապես, Երևանում համանախագահ երկրների դեսպանատներին կհանձնվեն նամակներ ՀՅԴ Գերագույն մարմնի հայտարարությամբ, ընդ որում, համանման ակցիաներ հայերի կողմից կանցկացվեն ամբողջ աշխարհում»,- ասաց Ռուստամյանը:
Նրա խոսքերով՝ մասնավորապես, սա կվերաբերի ՄԽ երեք անդամ-երկրների՝ Ռուսաստանին, Ֆրանսիային և ԱՄՆ-ին:
Նա նշեց, որ բոլոր երկրներում ակցիայի մասնակիցները կհնչեցնեն նամակը ընդհանուր բովանդակությամբ, որում, մասնավորապես, ասվում է, որ ««մեծ ութնյակի» վեհաժողովից հետո և Հայաստանի ու Ադրբեջանի նախագահներ Սերժ Սարգսյանի ու Իլհամ Ալիևի մոսկովյան հանդիպման նախաշեմին ՀՅԴ-ն դիմում է համանախագահ- երկրներին՝ հայտնելով ողջ հայ ժողովրդի խոր հիասթափությունը ԵԱՀԿ ՄԽ համանախագահ երկրների կողմից Հայաստանի վրա գործադրվող չարդարացված ու չհիմնավորված ճնշման առնչությամբ՝ ստիպելով Ղարաբաղյան հակամարտության առնչությամբ միակողմանի ու վտանգավոր զիջումների գնալ»:
«Տվյալ զիջումները սպառնալիքի տակ են դնում հայ ժողովրդի անվտանգությունը Հայաստանում և ԼՂՀ-ում, կբարձրացնեն Ադրբեջանի կողմից ագրեսիայի նոր ալիքի հնարավորությունը և վնաս կհասցնեն հակամարտության իրական կողմերի՝ իսկապես երկարատև ու կայուն խաղաղության հասնելու հնարավորություններին»,- ասաց Ռուստամյանը:
Նրա խոսքերով՝ նամակում նշվում է նաև, որ ներկայիս խաղաղ գործընթացի բացահայտ թերություններից է նաև այս գործընթացից Լեռնային Ղարաբաղի օրինական կերպով ընտրված ներկայացուցիչներին բացառելը:
«Որպես այս հակամարտության անմիջական կողմ, ադրբեջանական ագրեսիայի հիմնական զոհ, ու տարածաշրջանային խաղաղության լիարժեք անդամ՝ ԼՂՀ-ն պետք է խաղաղ գործընթացի բոլոր ասպեկտների լիարժեք ու իրավահավասար մասնակից լինի: Առանց այդ մասնակցության տարածաշրջանում արդար ու կայուն խաղաղություն պարզապես լինել չի կարող»,- ընդգծեց Ռուստամյանը:
Ավելին, ինչպես կարծում է, ՀՅԴ Գերագույն մարմնի ներկայացուցիչը, այսպես կոչված, Մադրիդյան սկզբունքները չեն համապատասխանում հակամարտության բնույթին ու պատմությանը: Դրանք նաև բացարձակապես հաշվի չեն առնում ԼՂՀ ժողովրդի ցանկությունը, որը օրինական կերպով այն արտահայտել է 1991 և 2006 թթ.-ին հանրաքվեների ժամանակ:
«Տվյալ հարցով անցկացված քննարկումները հանգեցրին այն կարծիքի, որ բանակցությունների ներկայիս ձևաչափում թերություններ կան, իսկ ԵԱՀԿ ՄԽ համանախագահ երկրների նախագահների մատնանշած հիմնական սկզբունքները պազրապես սպառնալիք են պարունակում ՀՀ և ԼՂՀ կենսունակությանը և, հետևաբար, չպետք է իրագործվեն հայկական իշխանությունների կողմից»,- ասաց Ռուստամյանը:
Ռուսաստանի, ԱՄՆ–ի և Ֆրանսիայի նախագահներ Դմիտրի Մեդվեդևը, Բարաք Օբաման և Նիկոլյա Սարկոզին վերջերս հանդես են եկել հայտարարությամբ, որում ասվում է, որ Երևանին և Բաքվին կներկայացվի Լեռնային Ղարաբաղի վերաբերյալ վերջին առաջարկությունների տարբերակը:
Զուգահեռ հրապարակվել են Ղարաբաղյան հիմնահարցի կարգավորման հիմնական սկզբունքները:
Այդ սկզբունքների թվում են, մասնավորապես, հանրաքվեի միջոցով ԼՂՀ ժողովրդի ինքնորոշման իրավունքի իրագործումը, Հայաստանի և Լեռնային Ղարաբաղի միջև ընդհանուր ցամաքային սահմանի առկայության անհրաժեշտությունը, անվտանգության երաշխիքների տրամադրումը։ --0--
