ԵՐԵՎԱՆ, 16 հուլիսի. /Նովոստի-Արմենիա/. Հայ և թուրք երիտասարդ ռեժիսորները վավերագրական ֆիլմերի նախագծերի վերջնական տարբերակներն են ներկայացրել «Ոսկե ծիրան» երևանյան միջազգային փառատոնի «Հայ-թուրքական կինոպլատֆորմի» շրջանակներում։
«Երեք օր մեր պլատֆորմի մասնակիցներն աշխատել են այդ ուղղությամբ, որպեսզի համապատասխանեցնեն իրենց նախագծերը միջազգային չափորոշիչներին, դրանք հասկանալի և համոզիչ դարձնեն պրոդյուսերների և կինոարտադրողների համար»,- ասաց փառատոնի գեղարվեստական ղեկավար Սուսաննա Հարությունյանը։
Հայ-թուրքական կինոպլատֆորմը բացվել է երկուշաբթի Երևանում «Ոսկե ծիրան» երևանյան միջազգային փառատոնի շրջանակներում։ Համագործակցությունը հայկական «Ոսկե ծիրանի» և թուրքական «Անադոլու կուլտուր» հասարակական կազմակերպության միջև սկսվել է 2007 թվականին, և այդ պահից ի վեր հայ և թուրք կինոգործիչները մի քանի անգամ հանդիպել են ինչպես Երևանում, այնպես էլ Ստամբուլում։
«Հայ-թուրքական կինոպլատֆորմի» շրջանակներում ներկայացվել են հայ կինոռեժիսորի մեկ և թուրք երիտասարդ ռեժիսորների երեք նախագիծ։
Հայ երիտասարդ կինոռեժիսոր Կարեն Խաչատրյանի նախագիծը նվիրված է 18-րդ դարում Կոստանդնուպոլսում հայ ընտանիքի պատկանող տպագրատան պատմությանը։
«Պատմական փաստ է, որ տպագրական հայտնի թուրքական տառատեսակ «Արաբօղլուն» ստեղծվել է հենց այս տպագրատան սեփականատիրոջ՝ Պողոս Արաբյանի կողմից»,- ասաց ռեժիսորը։
Նրա խոսքերով՝ «Արաբօղլու» վեցրոպեանոց վավերագրական ֆիլմի ստեղծման համար կպահանջվի մոտ 23 հազար եվրո։
«Ֆիլմը կպատմի ոչ միայն տպագրատան, այլև 18-րդ դարի Կոնստանդնուպոլսի կյանքի մասին»,- նշեց ռեժիսորը։
Թուրք կինոռեժիսոր Մուժդե Արսլանի նախագիծը նվիրված է հայ կանանց, ովքեր Առաջին համաշխարհային պատերազմի տարիներին առևանգվել են թուրքերի կողմից և իրենց կամքին հակառակ՝ դարձել նրանց կանայք։
«Այդ կանայք հետագայում վախենում էին ասել, որ իրենք հայուհիներ են։ «Անհավատների կանայք» ֆիլմում ես կփորձեմ փոխանցել նրանց ողբերգական ճակատագիրը։ Դա դժվար կլինի, քանի որ այդ հայուհիներն արդեն կենդանի չեն։ Նրանց պատմությունները կարելի է վերականգնել միայն ժառանգների պատմածով»,- ասաց Արսլանը։
Թուրք Հայդար Դեմիրտասի «Ասինե» նախագիծը նվիրված է նույն թեմային։
«Իմ Ասինե տատը հայուհի է եղել, ում բռնի կերպով որպես կին է առել մի թուրք Առաջին համաշխարհային պատերազմի տարիներին։ Այս պատմությունը վերջերս իմացա, և շատ զարմացած եմ, որ հայկական արմատներ ունեմ»,- ասաց կինոռեժիսորը։
Ըստ նրա, ինքը ցանկանում է նկարահանել այդ ֆիլմը, որպեսզի Թուրքիայում երկար տարիներ արգելված թեմաները վերջապես բարձրաձայնվեն։
«Ոսկե ծիրան» 6-րդ կինոփառատոնը կտևի 8 օր (հուլիսի 12-19-ը): Փառատոնի 2009 թ.-ի մրցութային ծրագիրը ներկայացված է երեք հիմնական անվանակարգերում. միջազգային խաղարկային, վավերագրական ֆիլմեր և «Հայկական համայնապատկեր»: -0--
