Հայաստանի ներկայացուցիչը կմասնակցի նախօրեին Իրանում ավիավթարի ենթարկված ՏՈՒ-154 ինքնաթիռի «սև արկղերի» վերծանման աշխատանքներին, «Նովոստի-Արմենիա» գործակալությանը տեղեկացրեց ՀՀ քաղաքացիական ավիացիայի գլխավոր վարչության մամուլի քարտուղար Նելլի Չերչինյանը:
Միաժամանակ մամուլի քարտուղարի խոքերով, դեռևս հայտնի չէ, թե հայ փորձագետներից կոնկրետ ով կմեկնի Իրան՝ «սև արկղերի» վերծանման գործընթացին մասնակցելու նպատակով:
Նախօրեին հայտնի դարձավ չորեքաշբթի իրանական Քազվին քաղաքի մոտակայքում ավիավթարի ենթարկված Տու-154Մ ինքնաթիռի երեք «սև արկղերից» երկուսի հայտնաբերման մասին:
Տեղեկատվության համաձայն՝ գտնված «սև արկղերը» լրջորեն վնասվել են: Արկղերը վերծանելիս խնդիրների առաջացման դեպքում իրանցի մասնագետները մտադիր են օգնության դիմել արտադրող-երկրի փորձագետներին:
Թեհրան-Երևան կանոնավոր չվերթն իրականացնող Caspian Airlines ավիաընկերությանը պատկանող Տու-154 ինքնաթիռը չորեքշաբթի ավիավթարի է ենթարկվել Թեհրանի մոտ: Նախնական տվյալների համաձայն՝ ինքնաթիռում գտնվող բոլոր 168 մարդիկ զոհվել են, որոնցից 15-ն անձնակազմի անդամներն էին: ՀՀ ԱԳՆ-ի տվյալների համաձայն՝ ինքնաթիռում գտնվել է շուրջ 40 հայ, որոնցից հինգը՝ Հայաստանի Հանրապետության քաղաքացի:--0—
