Նախնական տվյալներով՝ Իրանում ինքնաթիռի ավիավթարի արդյունքում զոհվել է Հայաստանի վեց քաղաքացի

Նախնական տվյալներով՝ Իրանում Տու-154 ինքնաթիռի ավիավթարի արդյունքում զոհվել է Հայաստանի վեց քաղաքացի, լրագրողներին հայտնեց Քաղաքացիական ավիացիայի գլխավոր վարչության պետի տեղակալ Արսեն Պողոսյանը:

Այդ թվում՝ Աշոտ Ներսիսյան, Արթուր Գրիգորյան, Կարինե Մարգարյան, Արա Սիրոյան և երկու բորտինժեներներ՝ Գրիգոր Բարսեղյան և Սուրեն Սողոմոնյան:  

Ընդհանուր առմամբ զոհերի ցուցակներում նշվում է 35 հայկական ազգանուն:

Նրա խոսքերով՝ վթարի ենթարկված ինքնաթիռում գտնվել է նաև Վրաստանի երկու քաղաքացի՝ Նիկոնովա Նաթելլա և Չկոդուա Գիվի, մյուսները Իրանի քաղաքացիներ են:

Բացի այդ, ինքնաթիռի ուղևորների մեջ եղել է երկու երեխա, որոնց ազգային պատկանելությունը ճշտվում է:

ՔԱԳՎ տվյալներով՝ Թեհրան-Երևան չվերթն իրականցնող Իրանում վթարի ենթարկված ինքնաթիռում եղել է 153 ուղևոր և անձնակազմի 15 անդամ:  

«ՏՈՒ-154» ինքնաթիռն իրականացնում էր Թեհրան-Երևան կանոնավոր չվերթը: Ինքնաթիռն ընկել է Թեհրանից 200 կմ հեռավորության վրա:-0-