Caspian Airlines ավիաընկերության Թեհրան-Երևան չվերթի վթարի վայրում բռնկված հրդեհը հաջողվել է մարել, փրկարարները փորձում են ինքնաթիռի բեկորների տակից հանել զոհերի այրված մարմինները, հայտնում է «ՌԻԱ Նովոստին»՝ հղում անելով ISNA իրանական տեղեկատվական գործակալությանը:
Press TV հեռուստաալիքը հեռարձակում է կադրեր ինքնաթիռի վթարի վայրից, որի արդյունքում, ենթադրաբար, զոհվել է 170 մարդ: Մասնավորապես, ցուցադրվել է 10 մետր խորությամբ հսկայական փոս դաշտի մեջտեղում, ընկած ինքնաթիռի բեկորներն ու մարդկային մարմինների մասեր:
Իրանում ավիավթարի ենթարկված Թեհրան-Երևան չվերթն իրականացնող ինքնաթիռը, ՀՀ Քաղավիացիայի գլխավոր վարչության տվյալներով՝ կործանվել է ժամը 11.09-ին՝ Իմամ Խոմեյնու անվան միջազգային օդանավակայանից օդ բարձրանալուց 16 րոպե անց։ Այդ ընթացքում ինքնաթիռը հասցրել է հավաքել մոտ 8 կիլոմետր բարձրություն։ Ինքնաթիռն ընկել է Թեհրանից 200 կմ հեռավորության վրա:
Նախնական տվյալներով՝ բոլոր 154 ուղևորներն ու անձնակազմի 16 անդամները մահացել են: Ինքնաթիռում գտնվող ուղևորների թվում եղել են ձյուդոյի Իրանի ազգային պատանեկան հավաքականի անդամները, որոնք գալիս էին Հայաստան մարզական հավաքներին մասնակցելու: Ինչպոս հաղորդում է ISNA-ն, նրանք բոլորը զոհվել են:
Միաժամանակ Վրաստանի ԱԳՆ մամուլի ծառայությունից հայտնեցին, որ զոհվել է Վրաստանի երկու քաղաքացի՝ Իրանում վրացական առաքելության ղեկավարի կինն ու Հայաստանում Վրաստանի դեսպանության ֆինանսական մենեջերը։
Ներկայումս զոհերի ցուցակները կախված են Երևանի «Զվարթնոց» օդանավակայանում, որտեղ, on-line չվացուցակի տեղեկատվության համաձայն, ինքնաթիռը պետք է վայրէջք կատարեր տեղական ժամանակով 12.00-ին: Օդանավակայանում, որտեղ այժմ աշխատում են «շտապ օգնության» լրացուցիչ բրիգադներ և հոգեբաններ, հավաքվում են ուղևորների հարազատները: «Զվարթնոցում» հերթապահում է նաև իրանական Caspian Airlines ավիաընկերության ներկայացուցիչը:
Իրանական ԶԼՄ-ները հաղորդում են տարբեր ականատեսների խոսքերը, որոնց մի մասն ասում է, որ «ինքնաթիռը անհետացել է օդում, իսկ հետո պայթել՝ բախվելով գետնին», իսկ մյուսները՝ որ «ինքնաթիռն այրվել է օդում»:
Իսկ Fars News Agency գործակալությունը՝ հղում անելով Կազվին նահանգի ղեկավարության ներկայացուցիչ Սիրոուս Սաբերիին, հաղորդել է, որ Իրանում կործանված Caspian Airlines ավիաընկերության Թեհրան-Երևան RV 7908 չվերթի Տու-154 ինքնաթիռը փորձել է վթարային վայրէջք կատարել, քանի որ ինքնաթիռում տեխնիկական խնդիրներ են առաջ եկել։
ՀՀ հանրային հեռուստաընկերությունը հայտնել է, որ վթարի պատճառը, նախնական տվյալներով, օդանավի շարժիչներից մեկում բռնկված հրդեհն է եղել։--0--
