ԵՐԵՎԱՆ, 15 հուլիսի. /Նովոստի-Արմենիա/. Իրանում կործանված Caspian Airlines ավիաընկերության Թեհրան-Երևան RV 7908 չվերթի Տու-154 ինքնաթիռը փորձել է վթարային վայրէջք կատարել, հաղորդում է իրանական անգլալեզու Press TV հեռուստաալիքը՝ հղում անելով Fars News Agency տեղեկատվական գործակալությանը:
Տու-154-ը, որում գտնվել են 153 ուղևորներ ու անձնակազմի 15 անդամներ, ընկել է Թեհրանից 200 կմ հեռավորության վրա Կազվին նահանգում:
Կազվին նահանգի ղեկավարության ներկայացուցիչ Սիրոուս Սաբերիի խոսքերով՝ ում խոսքերը մեջբերում է գործակալությունը, ինքնաթիռում տեխնիկական խնդիրներ են առաջ եկել, ինչից հետո փորձ է արվել վթարային վայրէջք կատարել:
«Դժբախտաբար, ինքնաթիռն այրվել է օդում, իսկ հետո ընկել... ինքնաթիռի տարբեր փոքր բեկորները կարելի է տեսնել գետնի վրա»,- նշել է Սաբերին:-0-
