Հայաստանում Մանկական Եվրատեսիլ-2009-ի ազգային ընտրական փուլի կազմակերպիչները վստահեցնում են, որ անաչառ մրցույթ է անցկացվել

ԵՐԵՎԱՆ, 15 հուլիսի. /Նովոստի-Արմենիա/. Հայաստանում Մանկական Եվրատեսիլ-2009-ի ազգային ընտրական փուլի կազմակերպիչները վստահեցնում են, որ անաչառ մրցույթ է անցկացվել և անհիմն են համարում ժյուրիի անաչառ չլինելու վերաբերյալ մեղադրանքները:

«Որոշ անբարեխիղճ ԶԼՄ-ներ ընտրական փուլի ժյուրիին և կազմակերպիչներին վարկաբեկելու քայլեր են ձեռնարկել՝ պնդելով, որ ընտրությունն ազնիվ չէր, իսկ հաղթողն ընտրվել էլ նախապես», - «Նովոստի-Արմենիա» գործակալությանն ասաց նախագծի ղեկավար, Հայաստանի Հանրային հեռուստատեսության գործադիր տնօրենի՝ հատուկ նախագծերի հարցերով խորհրդական Դիանա Մնացականյանը:

SMS-քվեարկության և ժյուրիի քվեարկության արդյունքներով՝ Լուարա Հայրապետյանը հուլիսի 11-ին Հայաստանի Հանրային հեռուստատեսության ուղիղ եթերում ընտրական փուլի հաղթող է ճանաչվել:

Մանկական Եվրատեսիլ-2009-ին Հայաստանը ներկայացնելու իրավունքի համար պայքարում էին յոթ կատարողներ և խմբեր՝ Ջուլի Բերբերյանն ու Լիկա Մուշեղյանը, «Ճերմակ ամպիկներ» խումբը, Լուարա Հայրապետյանը, «Ուրախ ղողանջներ» խումբը, «Զանգակ» խումբն ու Ռազմիկ Աղաջանյանը:

Մնացականյանը տեղեկացրեց, որ Լուարան հավաքել էր ամենաբարձր բալերը՝ թե SMS-քվեարկության, թե ժյուրիի որոշման արդյունքում:

«SMS-քվեարկության միջոցով Լուարայի օգտին քվեարկել էր 944 հեռուստադիտող, իսկ ժյուրին նրան 12 բալ էր շնորհել: Ռազմիկ Աղաջանյանի օգտին քվեարկել էր 861 մարդ (ժյուրին շնորհել էր 10 բալ), Ջուլի Բերբերյանի և Լիկա Մուշեղյանի օգտին՝ 303 մարդ (ժյուրին շնորհել էր 8 բալ), «Ուրախ ղողանջներ» խմբի օգտին՝ 805 մարդ (ժյուրին 6 բալ էր շնորհել), «Ճերմակ ամպիկներ» խմբի օգտին՝ 807 մարդ (8 բալ՝ ժյուրիի որոշմամբ), «Զանգակ» խմբի օգտին՝ 329 SMS-հաղորդագրություն (5 բալ՝ ժյուրիի որոշմամբ), Անգել Պետրոսյանի օգտին՝ 133 մարդ (7 բալ շնորհել է ժյուրին)», - տեղեկացրեց նախագծի ղեկավարը:

Մանկական Եվրատեսիլ-2009-ը կանցկացվի նոյեմբերի 21-ին Կիևում: Մրցույթին կմասնակցեն 13 երկրի ներկայացուցիչներ:-0-