ԵՐԵՎԱՆ, 14 հուլիսի. /Նովոստի-Արմենիա/. Երևանում հոկտեմբերի 23-25-ին կանցկացվի Համահայկական երրորդ տնտեսական ֆորումի «Պանարմենիան Էքսպո-2009» ցուցահանդեսը, հայտնեց ՀՀ Առևտրաարդյունաբերական պալատի նախագահ Մարտին Սարգսյանը:
«Նախկին ցուցահանդեսները կազմակերպվել են Հայաստան-Սփյուռք ֆորումի շրջանակներում, որոնց կազմակերպիչը ՀՀ կառավարությունն էր, այսօր Առևտրաարդյունաբերական պալատն իր ջանաքերով Սփյուռքի նախարարության և ԱԳՆ հետ համատեղ փորձում է այն կյանքի կոչել»,- երեքշաբթի մամուլի ասուլիսի ժամանակ լրագրողներին ասաց Սարգսյանը:
Նրա խոսքերով՝ ցուցահանդեսը կազմակերպվում է ֆինանսատնտեսական ճգնաժամի ժամանակահատվածում, և դրա հիմնական նպատակը պետք է առաջին հերթին հայ ձեռներեցների համար նոր շուկաների ու գործընկերների որոնումը լինի:
Սարգսյանը նշեց, որ Հայաստան կհրավիրվեն գործարարներ աշխարհի տարբեր երկրներից, ընդ որում ցուցահանդեսին կմասնակցեն ինչպես առանձին սուպերմարկետներ, այնպես էլ խոշոր ապրանքային բազաներ ներկայացնող տնտեսվարող սուբյեկտներ, որոնցում հայ գործարարները կկարողանան ներկայացնել ու իրացնել իրենց ապրանքը:
Սարգսյանը կարևորեց տվյալ ցուցահանդեսն ու հայտնեց, որ դրա նախապատրաստման աշխատանքներն ընթացքի մեջ են:
ՀՀ Առևտրաարդյունաբերական պալատի նախագահը հայտնեց նաև, որ ցուցահանդեսը օնլայն ռեժիմով կհեռարձակվի, ինչը թույլ կտա ծանոթանալ դրանում ներկայացված արտադրանքի հետ աշխարհի տարբեր անկյուններում:
Սարգսյանի խոսքերով՝ ցուցահանդեսի շրջանակներում նախատեսվում է համատեղ բիզնես-ֆորումի անցկացում, որին կներկայացվեն ՀՀ տնտեսության բոլոր այն ոլորտները, որոնցում հնարավոր է ներդրումներ անել: -0-
