ՀՀ նախագահ Սերժ Սարգսյանը երեքշաբթի Ֆրանսիայի կինոարտադրողների միության, Կինոարվեստի ֆրանսիական ակադեմիայի, «Սեզար» կինոմրցանակաբաշխության նախագահ, Կաննի կինոփառատոնի տնօրեն Ալեն Թերզյանին պատվո շքանշան է շնորհել:
Ինչպես «Նովոստի-Արմենիա» գործակալությանը հայտնեցին հայկական պետության ղեկավարի մամուլի ծառայությունից, շքանշանը շնորհվել է կինոարվեստի բնագավառում ունեցած ծանրակշիռ ավանդի, ինչպես նաև հայրենիքի հետ մշակութային սերտ համագործակցության ու հայ-ֆրանսիական բարեկամության խորացմանը նպաստող գործունեության համար:
Հանձնելով պետական բարձր պարգևը` նախագահ Սարգսյանը ողջունել է աշխարհահռչակ ռեժիսորի առաջին այցը Հայաստան:
«Մեր ժողովրդի ճակատագիրն այնպես է դասավորվել, որ նրա մի զգալի հատվածը սփռված է աշխարհով մեկ: Բայց սա մեզ համար նաև առավելություն է, և ես հաճախ եմ պնդում, որ Հայաստանը մի երկիր է առանց Սփյուռքի ու բոլորովին այլ երկիր` Սփյուռքով»,- ընդգծեց Սարգսյանը:
Նախագահի խսոքերով՝ Հայաստանը հպարտ է, որ Ալեն Թերզյանի նման հայրենակից ունի:
«Ձեր նմանների շնորհիվ է նաև Հայաստանն ավելի ճանաչելի դառնում աշխարհում: Մեր նպատակն է, որ դրսում ապրող մեր հայրենակիցները լինելով տվյալ երկրի լավ քաղաքացի` միաժամանակ Հայաստանը համարեն իրենց պատմական հայրենիքը»«- ասաց Սարգսյանը:
Սերժ Սարգսյանը ողջունել է աշխարհահռչակ ռեժիսորի մասնակցությունը «Ոսկե ծիրան» կինոփառատոնին:
Իր հերթին Թերզյանը նշեց, որ տպավորված է «Ոսկե ծիրան» փառատոնով, որը տարեցտարի ավելի ու ավելի մեծ համբավ է ձեռք բերում:
«Անչափ ուրախ եմ, հպարտ ու հուզված, որ Հայաստանում եմ` իմ պատմական հայրենիքում: Երբ ոտք դրեցի հայկական հողին, տարօրինակ զգացում ապրեցի: Դա մի բան է, որ կարող է հասկանալ միայն այն հայը, ով ամբողջ կյանքում երազել էր լինել Հայաստանում, և այդ երազանքը վերջապես իրականություն դարձավ»«- ասաց Թերզյանը:
Պատվո շքանշանը շնորհվում է ՀՀ պետական ու ազգային շահերի պաշտպանության համար, անկախության, ժողովրդավարության հաստատման գործում հատուկ արժանիքների, ՀՀ հետ բարեկամության հաստատման, ամրապնդման ու զարգացման համար, ինչպես նաև ժողովուրդների միջև խաղաղության ամրապնդման գործում ունեցած զգալի ավանդի համար: -0-
