Հայաստանի նախագահը Ֆրանսիայի դեսպանատան աշխատակիցներին շնորհավորել է Ազգային տոնի կապակցությամբ

ԵՐԵՎԱՆ, 14 հուլիսի. /Նովոստի-Արմենիա/. Ֆրանսիայի Ազգային տոնի առթիվ նախագահ Սերժ Սարգսյանը երեքշաբթի այցելել է Հայաստանում Ֆրանսիայի դեսպանատուն և Բաստիլի գրավման օրվա կապակցությամբ շնորհավորել դեսպանության աշխատակազմին, «Նովոստի-Արմենիա» գործակալությանը հայտնեցին հայկական պետության ղեկավարի մամուլի ծառայությունից:

Այցելության ընթացքում նախագահը Ֆրանսիային մաղթել է հետագա զարգացում, իսկ նրա ժողովրդին` բարգավաճում:

Երկրի ղեկավարը երախտագիտություն է հայտնել Ֆրանսիային` հայ ժողովրդի համար օրհասական պահին օգնության ձեռք մեկնելու, նրա մի զգալի հատվածին իր գիրկն ընդունելու, զարգանալու հնարավորություն ստեղծելու համար և նշել, որ նրանք այսօր լինելով լիիրավ ֆրանսիացի՝ հավատարիմ են նաև հայկական ինքնությանը:

Սերժ Սարգսյանը կարևորել է նաև 2001 թվականին Ֆրանսիայի կողմից օրենքի ուժով Հայոց ցեղասպանության ճանաչումը:

Մի քանի դար շարունակ Բաստիլի միջնադարյան ամրոցում է գտնվել Փարիզի հանրահայտ բանտը, որը աբսոլյուտիզմի խորհրդանիշ է դարձել: 1789 թ.-ի ժողովրդական հուզումների ժամանակ ամրոցը գրավվել է ու կործանվել: Բաստիլի գրավման օրը՝ հուլիսի 14-ը, ավանդաբար համարում են Ֆրանսիական մեծ հեղափոխության մեկնարկի ամսաթիվ:

Բաստիլի գրավման առաջին տարեդարձին Ֆրանսիայում «Դաշնության տոն» անցկացվեց, որի կազմակերպիչները ծրագրել էին ցույց տալ հեղափոխության արդյունքում ողջ ֆրանսիացի ժողովրդի միասնությունը: 1880 թ.-ին Ֆրանսիական Սենատը հուլիսի 14-ը Ֆրանսիայի ազգային տոն հռչակեց: -0-