Ռուսաստանը Հայաստանի համար եղբայր պետություն է ու ռազմավարական դաշնակից. նախագահ

ԵՐԵՎԱՆ, 13 հուլիսի. /Նովոստի-Արմենիա/. Ռուսաստանը Հայաստանի համար եղբայր պետություն է, ռազմավարական դաշնակից ու հիմնական տնտեսական գործընկեր, երկուշաբթի ՀՀ նախագահ Սերժ Սարգսյանն ասել է հանրապետությունում ՌԴ Արտակարգ և Լիազոր դեսպան Նիկոլայ Պավլովի հետ հանդիպման ժամանակ, որն ավարտում է իր առաքելությունը երկրում:

Ինչպես երկուշաբթի «Նովոստի-Արմենիա» գործակալությանը հայտնեցին նախագահի մամուլի ծառայությունից, նախագահը շնորհակալություն է հայտնել Նիկոլայ Պավլովին` դեսպանի պաշտոնում արդյունավետ գործունեության համար:

Բարձր գնահատելով հայ-ռուսական փոխհարաբերությունների ներկա մակարդակը` նախագահ Սարգսյանն ասել է, որ համագործակցության առկա մեծ ներուժն ավելիին հասնելու հնարավորություն է ընձեռում, ուստի պետք է աշխատել այն լիովին իրացնելու ուղղությամբ:

Սերժ Սարգսյանն ընդգծել է նաև երկկողմ քաղաքական երկխոսություն բարձր մակարդակը և հաճախականությունը, նշելով, որ այն թույլ է տալիս օպերատիվ և որակյալ լուծումներ տալու այն հարցերին, որոնք նպաստում են փոխգործակցության հետագա զարգացմանը:

Դեսպան Պավլովը նշել է, որ ջերմ հիշողություններով է հեռանում Հայաստանից և շնորհակալություն է հայտնել իր առաքելության ընթացքում ցուցաբերված աջակցության համար:

Նախագահ Սարգսյանը դիվանագետին մաղթել է հետագա հաջողություններ և հույս հայտնել, որ Հայաստանի հետ  նրա բարեկամական կապը հետայսու ևս կշարունակվի:

ՌԴ նախագահ Դմիտրի Մեդվեդևը հուլիսի 7-ին հրամանագիր է ստորագրել Վյաչեսլավ Կովալենկոյին Հայաստանում ՌԴ նոր Արտակարգ և Լիազոր դեսպան նշանակելու մասին: Ավելի վաղ Կովալենկոն զբաղեցնում էր Ռդ դեսպանի պաշտոնը Վրաստանում:-0-