Հայաստանի պաշտպանության նախարար Սեյրան Օհանյանն ուրբաթ ազգային անվտանգության խնդիրներ քննարկեց սփյուռքահայ երիտասարդության՝ «Դեպի Հայք» հիմնադրամի կամավորների հետ։
«Նմանատիպ հանդիպումներն անհրաժեշտ են սփյուռքի հետ կապերն ամրապնդելու և բանակը հասարակության համար ավելի բաց դարձնելու համար»,- հանդիպման ընթացքում ասաց Օհանյանը։
Իր հերթին «Դեպի Հայք» հիմնադրամի տնօրեն Սևան Քաբաքյանն ասաց, որ նմանատիպ հանդիպումները շատ կարևոր են Հիմնադրամի համար, քանի որ դրա նպատակը երիտասարդ սփյուռքահայության շրջանում հայրենասիրություն դաստիարակելն է։
«Հիմնադրամի ծրագրում ընդգրկված են տարբեր հանդիպումներ, որոնց նպատակը Հիմնադրամի ներկայացուցիչներին Հայաստանի տարբեր ոլորտների հետ ծանոթացնելն է»,- ասաց Քաբաքյանը։
«Դեպի Հայք» հիմնադրամը ստեղծվել է 2004 թվականին։ Հիմնադրամի ստեղծման պահից այնտեղ աշխատել է շուրջ 400 սփյուռքահայ երիտասարդ կամավոր, ովքեր հայրենիքի զարգացմանը նպաստելու համար կամավոր աշխատում են Հայաստանի տարբեր ոլորտներում։ Ներկայում Հիմնադրամում աշխատում է 52 կամավոր։
Հայկը, համաձայն հայկական առասպելի, հայերի նախահայրն է։ Հայք են կոչում նաև Հայաստանը։ -0-
