Հայաստանում 2010թ.-ին կմեկնարկի ուսանողական վարկերի տրամադրման փորձնական ծրագիրը. ՀՀ կրթության և գիտության նախարար

Հայաստանում 2010թ.-ին կմեկնարկի ուսանողական վարկերի տրամադրման փորձնական ծրագիրը, ուրբաթ խորհրդարանում ասաց ՀՀ կրթության և գիտության նախարար Արմեն Աշոտյանը:

ՀՀ խորհրդարանն այսօր վավերացրեց Միջազգային զարգացման ասոցիացիայի (IDA) հետ՝ 17 միլիոն SDR-ի կամ շուրջ 25 միլիոն դոլարի միջազգային համաձայնագիրը՝ «Կրթության որակ և համապատասխանություն» երկրորդ ծրագրի իրագործման համար: Ծրագրի շրջանակներում նախատեսվում է բարեփոխումներ իրականացնել նախադպրոցական և բուհական կրթության ոլորտում, ինչպես նաև ուսանողական վարկերի տրամադրման ծրագիր ներդնել:

Նախարարի խոսքերով, Հայաստանը վաղուց էր մշակում ուսանողական վարկերի տրամադրման ծրագիրը, սակայն վարկավորման մեխանիզմների և գործիքների բացակայության պատճառով նախագիծը չէր կարող իրագործվել:

«Միջազգային զարգացման ասոցիացիայի կողմից տրամադրվող վարկը պետությանը հնարավորություն կտա աջակցություն ցուցաբերել սոցիալապես անապահով ընտանիքների ուսանողներին բարձր և միջին-մասնագիտական կրթություն ստանալու հարցում», - ասաց Աշոտյանը:

Ինչպես կարծում է նախարարը, այս ծրագիրը թույլ կտա բարձրացնել ոչ միայն կրթության որակը, այլև՝ դրա մատչելիությունը բնակչության բոլոր շերտերի համար:

«Ուսանողական վարկերի տրամադրման մեխանիզմները լրացուցիչ մշակման կարիք ունեն, ինչի կապակցությամբ ծրագիրը կներդրվի 2010թ.-ին փորձնական ռեժիմով, իսկ վերջնական մշակումից և վարկավորման կատարելագործված մեխանիզմների ներդրումից հետո այն լիարժեք կսկսի գործել 2014 թ.-ից», - ասաց Աշոտյանը:-0-