ԵԽԽՎ Հայաստանի վերաբերյալ նոր բանաձևը բավականին օբյեկտիվ փաստաթուղթ է, քանի որ ընդհանուր առմամբ ճիշտ է արտացոլում իրավիճակը հանրապետությունում, ուրբաթ մամուլի ասուլիսի ժամանակ ասաց ՀՀ մարդու իրավունքների պաշտպան Արմեն Հարությունյանը:
«Փաստաթուղթը փաստում է, որ չլուծված խնդիրները Հայաստանում ավելի շատ են, քան լուծվածները: Երկրում առաջվա պես չկա կառուցողական ներքաղաքական երկխոսություն, տիրում է անհանդուրժողականության մթնոլորտ»,- ասաց մարդու իրավունքների պաշտպանը:
Մեկնաբանելով «Ժառանգություն» ընդդիմադիր խմբակցության պատգամավոր Զարուհի Փոստանջյանի արարքը, ով թույլ է տվել ադրբեջանցի և թուրք պատվիրակներին ԵԽԽՎ-ում ստորագրել իր առաջարկների տակ, Օմբուդսմենն ասաց, որ նման քայլն, ավելի շուտ, գալիս է նրա անփորձությունից:
«Հասարակության արձագանքը այս միջադեպին ևս մեկ անգամ ցույց տվեց, որ մեր հասարակությունում ծայրահեղականությունների և անհանդուրժողականության մթնոլորտ է տիրում: Հասարակության մի մասը Փաստանջյանին դավաճան է համարում, մյուս մասը՝ հերոսուհի»,- նշեց Մարդու իրավունքների պաշտպանը:
Բացի այդ նա ընդգծեց, որ Ադրբեջանի և Թուրքիայի ներկայացուցիչները բարոյական իրավունք չունեն Հայաստանում մարդու իրավունքների պաշտպանությանը վերաբերող որոշումներ ընդունելու:
Հունիսի 24-ն Ստրասբուրգում կայացած ԵԽԽՎ նստաշրջանի շրջանակներում անցկացված հերթական նիստում քննարկվեց Հայաստանում տիրող իրավիճակը: Արդյունքում ընդունվեց նոր բանաձև՝ №1677, որի համաձայն՝ երկիրը կշարունակի մնալ մոնիտորինգի տակ:
«Ժառանգություն» խմբակցությունից ՀՀ ԱԺ պատգամավոր Զարուհի Փոստանջյանը ԵԽԽՎ քննարկմանն է ներկայացրել երեք հիմնական կետ պարունակող փաստաթուղթ՝ բանաձևում Հայաստանի իշխանությունների նկատմամբ պահանջների ամրագրում, 2008թ.-ի մարտյան իրադարձությունների կապակցությամբ ձերբակալված անձանց ազատ արձակմանն ուղղված քայլերի կիրառում, փաստահավաք խմբի վերաձևավորում: Պատգամավորը նաև առաջարկել է Հայաստանի հարցով համազեկուցողներին մինչև ձմեռային նստաշրջան մեր երկրի պարտավորությունների մասին նոր զեկույց պատրաստել: Փոստանջյանը դիմել է նաև ԵԽԽՎ-ում Թուրքիայի և Ադրբեջանի ներկայացուցիչներին՝ փաստաթուղթը ստորագրելու խնդրանքով:--0--
