ՀՀ մարդու իրավունքների պաշտպանի արագ արձագանքման խումբն այցելել է հացադուլ հայտարարած ձերբակալվածին

ԵՐԵՎԱՆ, 9 հուլիսի. /Նովոստի-Արմենիա/. ՀՀ մարդու իրավունքների պաշտպանի արագ արձագանքման խումբն այցելել է նախօրեին հացադուլ հայտարարած ձերբակալված Տիգրան Առաքելյանին, որը գտնվում է ՀՀ ոստիկանության Երևան քաղաքի վարչության ձերբակալված անձանց պահման վայրում:

Պաշտպանի ներկայացուցիչները ՁՊՎ-ում հանդիպել և առանձնազրույց են ունեցել հացադուլ հայտարարած ձերբակալված Տիգրան Առաքելյանի հետ: Վերջինս հայտնել է, որ 2009 թվականի հուլիսի 06-ին, ժամը տասից հայտարարել է հացադուլ, քանի որ նախաքննական մարմինը բացարձակ անհիմն կերպով իրեն կասկածում է հանցագործության կատարման մեջ:

Հայտնել է նաև, 2009 թվականի հուլիսի յոթի երեկոյան իր ինքնազգացողությունը վատացել է, իրեն այցելել է ՁԱՊՎ-ի բուժակը, որից հետո ՁՊՎ-ի վարչակազմի կողմից հրավիրվել է շտապ օգնության անձնակազմ:

Պաշտպանի ներկայացուցիչները պարզելով, որ այցելության պահին Տիգրան Առաքելյանին դեռևս մեղադրանք առաջադրված չէ և նա գտնվում է կասկածյալի կարգավիճակում՝ բացատրել են նրա որպես կասկածյալ և ձերբակալված անձ օրենքով սահմանված  իրավունքներն` այդ թվում նաև պաշտպան ունենալու իրավունքը:

Տիգրան Առաքելյանը հայտնել է, որ ձերբակալման պահից ունի պաշտպան և գոհ է նրա մատուցած ծառայություններից:

Ինչպես Տիգրան Առաքելյանը, այնպես էլ այցելության պահին ՁԱՊՎ-ում պահվող մյուս անձինք, որոնց հետ նույնպես հանդիպել և առանձնազրույց են ունեցել Պաշտպանի ներկայացուցիչները, ՁԱՊՎ- ի աշխատակիցների կամ իրենց պահման պայմանների վերաբերյալ որևէ բողոք չեն հայտնել: 

Տիգրան Առաքելյանը կալանավորվել է՝ հուլիսի 1-ի ընդհարմանը մասնակցելու մեղադրանքով։  Հուլիսի 2-ին Ոստիկանությունը հաղորդագրություն է տարածել, որ նախօրեին ՀՀ ոստիկանության մի քանի աշխատակից Երևանի կենտրոնական փողոցներից մեկում նկատել են շուրջ 60 վիճաբանող քաղաքացու: Մոտենալով նրանց` ցույց են տվել ծառայողական վկայականները և պահանջել, որ դադարեցնեն վիճաբանությունը, սակայն հավաքվածները տեղեկանալով, որ նրանք ոստիկանության ծառայողներ են, հարձակվել են վերջինների վրա, փայտե մահակներով, ձեռքերով ու ոտքերով ծեծի ենթարկել նրանց:--0--