Հայաստանը շահագրգռված է Իտալիայի հետ բազմաբնույթ համագործակցության ընդլայնմամբ. նախագահ

ԵՐԵՎԱՆ, 9 հուլիսի. /Նովոստի-Արմենիա/. Հայաստանը շահագրգռված է Իտալիայի հետ բազմաբնույթ համագործակցության ընդլայնմամբ, հինգշաբթի ասաց ՀՀ նախագահ Սերժ Սարգսյանը՝ Հայաստանում Իտալիայի նորանշանակ դեսպան Բրունո Սկապինիի հավատարմագրերն ընդունելով:

Ինչպես «Նովոստի-Արմենիա» գործակալությանը հայտնեցին հայկական պետության ղեկավարի մամուլի ծառայությունից, նախագահն ընդգծել է, որ դրա համար լավ հիմք է փոխադարձ ցանկությունը, պատմական ընդհանություններն ու այն արժեքները, որոնց դավանում են երկու երկրները:

Ընդ որում Սարգսյանն ընդգծեց, որ հայ-իտալական գործակցությունը զարգացման լավ հեռանկար ունի նաև բազմակողմ ձևաչափերում:

Իր հերթին Սկապինին, կարևորելով հայ-իտալական փոխադարձ համակրանքի ու ջերմ հարաբերությունների ձևավորված ավանդույթը, ասել է, որ կանի առավելագույնն՝ ամրապնդելու առկա համագործակցությունն ու ստեղծելու նոր հնարավորություններ:

Որպես իր գործունեության առաջնային ուղղություններ նա նախանշել է առետրատնտեսական հարաբերությունների խթանումը, բարձր մակարդակի փոխայցելությունների ակտիվացումը:

Զրուցակիցները քննարկել են նաև տարածաշրջանային հարցեր: Նախագահ Սարգսյանը ողջունել է Իտալիայի հավասարակշիռ դիրքորոշումը տարածաշրջանի զգայուն խնդիրների նկատմամբ:

Երկրի ղեկավարը մեկ անգամ ևս ընդգծել է առկա խնդիրները խաղաղ ճանապարհով լուծելու Հայաստանի վճռականությունը` նշելով, որ դրա համար կան բոլոր հնարավորություններ: Դեսպան Սկապինին նշել է, որ Իտալիան մշտապես իր աջակցությունն է հայտնում խաղաղությանը միտված գործընթացին:

Հաջողություն մաղթելով նորանշանակ դեպանին` նախագահ Սարգսյանն ասել է, որ նա իր գործունեությունը սկսում է մի երկրում, որը չունի հարուստ բնական պաշարներ, սակայն ունի պատմական ու մշակութային մեծ ժառանգություն, եվրոպական չափանիշներով ապրելու ձգտում և հարևանների հետ հարաբերությունները կարգավորելու բարի կամք:-0-