ԵՐԵՎԱՆ, 8 հուլիսի. /Նովոստի-Արմենիա/. Հայաստանում ապրող հինգ ռուս ընտանիք չորեքշաբթի Երևանում Գիտության ու մշակույթի ռուսական կենտրոնի կողմից պարգևատրվել է մեդալներով տարիներ շարունակ ամուր ընտանիք պահելու համար:
Մի քանի տասնամյակ միասին ապրող և երեխաներ ու թոռներ դաստիարակած ամուսնական զույգերը պարգևատրվել են ոսկե մեդալներով ու պատվոգրերով:
Ինչպես նշեց ԳՄՌԿ տնօրեն Վլադիմիր Զյուրյուկինը, միջոցառումնը նվիրված էր Ռուսաստանում հուլիսի 8-ին նշվող Ընտանիքի, սիրո և հավատարմության օրվան:
«Այդ տոնը Ռուսաստանում նշվում է արդեն երկրորդ տարին: Մենք որոշել ենք հենց այսօր պարգևատրել ընտանիքի ամրությամբ աչքի ընկնողներին, քանի որ օրինակը ընտանիքի ինստիտուտի ապագայի և երկրի ապագայի հանդեպ հավատ է ներշնչում»,- ասաց Զյուրյուկինը:
Ավագ քահանա հայր Արսենիի խոսքերով, ներկայում ընտանիքի հիմքերը երկու չարիք է քանդում՝ արհեստական վիժեցումն ու ամուսնական անհավատարմությունը:
«Սարսափելին այն է, որ այս երկու երևույթները մեր ժամանակներում որպես երևույթներ են ընկալվում, մինչդեռ սրանք սոսկալի մեղքեր են»,- ընդգծեց հայ Արսենին՝ հավելելով, որ հնարավոր չէ առողջ հասարակություն կառուցել՝ չհրաժարվելով այդ մեղքերից:
Ընտանիքի, սիրո և հավատարմության օրը սահմանվել է 2008թ.-ին Պետական Դումայի պատգամավորների նախաձեռնությամբ: Տոնի գաղափարը ծնվել է մի քանի տարի առաջ Մուրոմա քաղաքի բնակիչների մոտ, որտեղ հանգչում են սուրբ ամուսիններ Պյոտրի և Ֆևրոնիայի՝ քրիստոնեական ամուսնության պաշտպանների մասունքները, ում հիշատակությունը կատարվում է հուլիսի 8-ին:
Նրանց կյանքը մարմնավորում են այն հասկացությունները, որոնք Ռուսաստանի ավանդական կրոնները կապել են ամուսնության իդեալի հետ, այսինքն՝ բարեպաշտությունը, փոխադարձ սերն ու հավատարմությունը, գթասիրտ արարքների կատարումն ու համաքաղաքացիների տարբեր կարիքների հոգածությունը:
Տոնի խորհրդանիշը երիցուկն է: -0-
