Ղարաբաղյան կարգավորման հարցով ԵԱՀԿ ՄԽ ամերիկացի համանախագահ Մեթյու Բրայզան հերքել է իր՝ Ադրբեջանում ԱՄՆ դեսպան նշանակվելու մասին լուրերը:
ՎերջԻն ժամանակում ադրբեջանական ԶԼՄ-ներում տեղեկատվություն է հայտնվել ամերիկացի համանախագահի՝ Բաքվում դեսպան նշանակվելու մասին:
«Ինձ առայժմ ուրիշ պաշտոնում չեն նշանակել. ես ԵԱՀԿ ՄԽ համանախագահ եմ: Լուրեր կային, որ ինձ այլ պաշտոնների կնշանակեն Եվրոպայի երկրներում: Բարեբախտաբար կամ դժբախտաբար իմ նախագահն ինձ որևէ այլ պաշտոնի չի նշանակել»,- չորեքշաբթի Երևանում մամուլի ասուլիսի ժամանակ ասաց Բրայզան:
Մեթյու Բրայզան Ղարաբաղյան կարգավորման հարցով ԵԱՀԿ ՄԽ մյուս համանախագահներ Յուրի Մերզլյակովի (Ռուսաստան) և Բեռնար Ֆասիեի (Ֆրանսիա) հետ հուլիսի 6-ից այցով գտնվում է Երևանում: Համանախագահները հանդիպումներ են ունեցել ՀՀ նախագահ Սերժ Սարգսյանի և ԱԳՆ ղեկավար Էդվարդ Նալբանդյանի հետ:
Ամերիկացի համանախագահը հիշեցրեց, որ պետքարտուղար Հիլարի Քլինթոնի կողմից իր առաջ դրված գլխավոր առաջադրանքը Ղարաբաղյան հակամարտության լուծմանն աջակցելն է: Նրա խոսքերով, պետքարտուղար Քլինթոնն անգամ խորհուրդ է տվել իրեն մնալ հակամարտության տարածաշրջանում՝ մշտապես հետևելով իրադրության զարգացմանը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
