ԵՐԵՎԱՆ, 8 հուլիսի /Նովոստի-Արմենիա/. «Միջկուսակցական խորհրդատվություններ» նախաձեռնությունը պատրաստ է իր շարքերում ընդգրկել ակտիվ քաղաքական գործիչների, չորեքշաբթի «Միջկուսակցական խորհրդատվություններ» նախաձեռնության գործունեության տարեդարձին նվիրված խորհրդակցության ժամանակ հայտարարեց ՄՀ ղեկավարներից մեկը՝ ՀՀ Միավորված կոմունիստական կուսակցության առաջնորդ Յուրի Մանուկյանը:
««Միջկուսակցական խորհրդատվություններ» քաղաքական ձևաչափը բաց է բոլոր նրանց համար, ովքեր պատրաստ են իրենց ներդրումն ունենալ քաղաքական գործունեության մեջ Հայաստանի բարգավաճման համար, և մենք ուրախ կլինենք մեր շարքերն ընդունել այդ քաղաքական գործիչների»,- ասաց Մանուկյանը:
Նրա խոսքերով, ՀՀ քաղաքական համակարգում շատ քաղաքական գործիչներ կան, ովքեր հաճախ իրենց առաջնորդի տեղ են դնում, այն դեպքում, երբ ՄԽ քաղաքական ձևաչափում առաջնորդ չկա, այլ կան համատեղ աշխատանքով ժողովրդին հուզող տարբեր խնդիրներ լուծելու պատրաստ մարդիկ:
Մանուկյանը կարծում է, որ ՀՀ քաղաքական դաշտն այսօր չափազանց աղավաղված է, և այն մաքրման կարիք ունի, ինչին կարող է նպաստել համապատասխան մարդկանց համատեղ աշխատանքը:
Դեմկուսի առաջնորդ Արամ Սարգսյանը նշեց, որ ՄԽ դռները բաց են բոլոր նրանց առջև, ովքեր պատրաստ են ընդունել «Միջկուսակցական խորհրդատվությունների» սկզբունքներն ու գործել դրանց համապատասխան:
«Միջկուսակցական խորհրդատվությունների» մասնակիցների առաջին պաշտոնական հանդիպումը տեղի ունեցավ 2008թ.-ի հուլիսի 8-ին: Այդ նախաձեռնության մեջ ընդգրկված է 5 կուսակցություն. «Սահմանադրական իրավունք» միությունը, «Ազգային ինքնորոշում միավորումը, Հայաստանի Դեմոկրատական կուսակցությունը, Հայաստանի Քրիստոնեադեմոկրատական կուսակցությունը, Հայաստանի Միավորված կոմունիստական կուսակցությունը:
Մեկ տարվա ընթացքում ՄԽ շրջանակներում անցկացվել է ավելի քան 20 հանդիպում, որոնց արդյունքում ֆորումի մասնակիցները հստակեցրել են սեփական քաղաքական դիրքորոշումներն ու զարգացման հետագա քայլերը:
«Մեր համատեղ աշխատանքը ցույց տվեց, որ այսօր մեր կողմից ստեղծված ՄԽ քաղաքական ձևաչափը հատուկ տեղ ունի ՀՀ քաղաքական համակարգում և այն այսուհետ էլ կշարունակի»,- հայտարարեց «Սահմանադրական իրավունք» միություն կուսակցության նախագահ Հայկ Բաբուխանյանը:
Նա հայտնեց, որ անցյալ տարի ՄԽ քաղաքական ձևաչափը շատ արդյունավետ աշխատանքներ կատարեց, որոնց թվում էին Հարավային Օսեթիայի և Աբխազիայի անկախության մասին, հայ-թուրքական հարաբերությունների մասին հայտարարությունների ընդունումը և Երևանի մասին օրինագծի փոփոխությունների ցուցակը ՀՀ ԱԺ-ին ներկայացնելն ու հաստատելը:-0-
