Հայ փորձագետը լիովին բացառում է ԱՄՆ-ի և Ռուսաստանի համագործակցության հնարավորությունը Հարավային Կովկասում

ԵՐԵՎԱՆ, 8 հուլիսի. /Նովոստի-Արմենիա/. ԱՄՆ-ի և Ռուսաստանի համագործակցության հնարավորությունը Հարավային Կովկասում լիովին բացառված է, կարծում է հայ քաղաքագետ Սերգեյ Շաքարյանցը։

«Հարավային Կովկասի նկատմամբ Միացյալ Նահանգներն ու Ռուսաստանը չունեն ընդհանուր գծեր։ Հարավային Կովկասը կմնա այդ երկրների շահերի բախման վայրը»,- չորեքշաբթի մամուլի ասուլիսի ժամանակ ասաց  Շաքարյանցը։

Նրա խոսքերով, Միացյալ Նահանգները ձգտում է, որ «Կովկասի տերը» դառնա Թուրքիան, «ընդ որում սա արդեն այնքան ակնհայտ փաստ է, որ նույն Թուրքիան դա չի հերքում»։

Միևնույն ժամանակ Շաքարյանցն ընդգծեց, որ Թուրքիայի նկատմամբ զգալի ճնշում է գործադրվում Ռուսաստանի կողմից, և ԱՄՆ ներկայությունը Կովկասում այդ ճնշման բացասական ազդեցությունը թույլ չտալու նպատակ ունի։

Շաքարյանցի խոսքերով, Մեդվեդևի և Օբամայի կայացած հանդիպման արդյունքում կողմերը չկարողացան Եվրոպայի ամերիկյան հակահրթիռային համակարգերի վերաբերյալ պայմանավորվածություն ձեռք բերել։

«Դա նշանակում է, որ Իրանի միջուկային ծրագրի հարցում էլ կողմերը բոլորովին չեն մոտեցրել իրենց դիրքերը»,- պարզաբանեց փորձագետը։

Ըստ Շաքարյանցի, ոչ Նահանգները, ոչ Եվրամիության որևէ այլ առաջատար երկիր ի զորու չէ կոտրել Ռուսաստանի վճռականությունը Հարավային Կովկասի ուղղությամբ, ինչը պարզ դարձավ 2008 թվականի օգոստոսյան իրադարձություններից հետո։

Նա համոզված է, որ եթե Ամերիկան հարվածի Իրանին, ապա Ռուսաստանը կկարողանա ուժ գործադրել ԱՄՆ-ի ցանկացած դաշնակցի նկատմամբ։

«Ռուսաստանն ու Իրանը տարածաշրջանում բավական համաձայնեցված են գործում և կտրականապես հանդես են գալիս Հարավային Կովկասում ոչ տարածաշրջանային որևէ ուժի՝ գերակշռիռ լինելու դեմ»,- նշեց Շաքարյանցը։

Մինչդեռ քաղաքագետն ընդգծեց, որ թեև Մեդվեդևն ու Օբաման պայմանավորվել են միջուկային հրթիռների փոխադարձ կրճատման մասին, այդ հանգամանքը զգալի նշանակություն չունի։ «Աշխարհը կարելի է ոչնչացնել նույնիսկ հարյուր հրթիռով, իսկ կրիտիկական այդ շեմն ամեն դեպքում կմնա երկու կողմերի մոտ»,- ասաց Շաքարյանցը։

Հուլիսի 6-ին Մոսկվայում տեղի ունեցած Ռուսաստանի և ԱՄՆ նախագահների հանդիպման ընթացքում ձեռք է բերվել պայմանավորվածություն այն մասին, որ Մոսկվան ու Վաշինգտոնը կկրճատեն իրենց հրթիռամիջուկային պոտենցիալը մինչև 1500-1675 մարտագլխիկի և 500-1100 հրթիռակրի։ -0-