Հայաստանի խորհրդարանի կողմից հունիսի 19-ին հայտարարված համաներման արդյունքում հուլիսի 8-ի դրությամբ երկրի տարբեր քրեակատարողական հաստատություններից 384 մարդ է ազատ արձակվել, չորեքշաբթի «Նովոստի-Արմենիա» գործակալությանը տեղեկացրեց ՀՀ Վճռաբեկ դատարանի մամուլի քարտուղար Ալինա Ենգոյանը:
Հաղորդագրության համաձայն, Վճռաբեկ դատարանում գտնվող գործերով ազատ է արձակվել մեկ մարդ, Վերաքննիչ դատարանում՝ 36 մարդ, մայրաքաղաքային կենտրոն և Նորք-Մարաշ համայնքների ընդհանուր իրավասության դատարաններում՝ 34 մարդ, Արաբկիր, Քանաքեռ-Զեյթուն համայնքներում՝ 25 մարդ, Աջափնյակ և Դավթաշեն համայնքներում՝ 8 մարդ, Մալաթիա-Սեբաստիայում՝ 13 մարդ, Շենգավիթում՝ 22 մարդ, Ավանում և Նոր Նորքում՝ 16, Էրեբունիում և Նուբարաշենում՝ 6:
Բացի այդ, ՀՀ Կոտայքի մարզի ընդհանուր իրավասության դատարանում գտնվող գործերով ազատ է արձակվել 21 մարդ, Արագածոտնի մարզում՝ 1, Արարատի և Վայոց Ձորի մարզերում՝ 4, Արմավիրում՝ 7, Գեղարքունիքի մարզում՝ 25, Շիրակում՝ 21, Տավուշում՝ 33, Սյունիքում՝ 60, Լոռում՝ 51:
ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:
Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում: Համաներումը տարածվում է նաև հետախուզման մեջ գտնվող անձանց վրա, ովքեր կհանձնվեն իրավապահ մարմիններին մինչև 2009թ.-ի հուլիսի 31-ը:-0-
