Հայաստանը շահագրգռված է ԱՄՆ-ի հետ հարաբերությունների զարգացմամբ, ասաց ՀՀ նախագահ Սերժ Սարգսյանը ԱՄՆ Անկախության օրվա առթիվ ամերիկյան դեսպանատուն այցի ընթացքում:
«Մենք իրապես շահագրգռված ենք Միացյալ Նահանգների հետ մեր հարաբերությունների հետագա զարգացմամբ: Մենք Միացյալ Նահանգներին ընկալում ենք ոչ միայն որպես հզոր երկիր, որպես Հայաստանին ամենամեծ մարդասիրական օգնությունը ցուցաբերող երկիր, այլև մի երկիր, որը ամենաօրհասական պահին մեր ժողովրդին օգնության ձեռք մեկնեց, նրա մի ստվար հատվածին իր գիրկն ընդունելով՝ հնարավորություն տվեց զարգանալու և իրենց ավանդը ներդնելու ինչպես Միացյալ Նահանգների հզորացման, այնպես էլ իրենց ազգային ինքնությունը պահպանելու գործում»,- Սարգսյանի խոսքերը մեջբերեցին հայկական պետության ղեկավարի մամուլի ծառայությունից:
Շնորհավորելով դեսպանության բարձրաստիճան աշխատակիցներին անկախության 233-րդ տարեդարձի կապակցությամբ՝ նախագահ Սարգսյանը Միացյալ Նահանգներին ցանկացել է հետագա հզորացում, իսկ նրա ժողովրդին` բարգավաճում:
Հայաստանի Հանրապետությունում Միացյալ Նահանգների արտակարգ և լիազոր դեսպան Մարի Յովանովիչի հետ ծավալված առանձնազրույցի ընթացքում երկուստեք ընդգծվել է հայ-ամերիկյան հարաբերությունները տարբեր ոլորտներում առաջ մղելու ցանկությունն ու պատրաստակամությունը:
Առանձնազրույցի ընթացքում անդրադարձ է կատարվել նաև հայ-թուրքական քաղաքական երկխոսությանը:-0-
