Ռուսաստանյան փորձագետը ճգնաժամը ճշմարտության պահ է համարում ԱՊՀ-ի համար

Ռուսաստանյան հայտնի փարձագետ, ՖՀԽ ռազմավարական վերլուծության դեպարտամենտի տնօրեն Իգոր Նիկոլաևը նշեց, որ տնտեսական ճգնաժամը ճշմարտության պահ է ԱՊՀ-ի համար։

«Եթե մենք ցանկանում ենք պահպանել ԱՊՀ-ն, ապա պետք է հասկանալ, որ ուժեղ կենտրոնը Համագործակցության պահպանման երաշխիքն է։ Տվյալ ասպեկտում ռուսաստանյան տնտեսության հաջողությունները կամ ձախողումները ոչ միայն Ռուսաստանի, այլև ԱՊՀ-ի գործն են»,- երկուշաբթի հայտարարեց Նիկոլաևը «ԱՊՀ. Փորձություն տնտեսական ճգնաժամով» թեմայով Երևան-Մոսկվա տեսակամուրջի ընթացքում։

Նրա խոսքերով՝ Ռուսաստանն ԱՊՀ կենտրոնն է, և կենտրոնի հնարավոր թուլացումը օբյեկտիվորեն կաշխատի կենտրոնախույս միտումների օգտին։ «Այդ պատճառով ճգնաժամը ԱՊՀ-ի համար ճշմարտության պահ է»,- ասաց Նիկոլաևը։

Նա նշեց նաև, որ 2009 թվականի առաջին եռամսյակում ՀՆԱ ամենավատ ցուցանիշները ԱՊՀ երկրների թվում գրանցվել են Ուկրաինայում և Մոլդովայում, միժամանակ մյուս երկրները նույնպես վնաս են կրում, իսկ «Ռուսաստանը և Հայաստանը շատ մոտ են կանգնած ՀՆԱ-ի անկման առումով»։

Ինչ վերաբերում է ճգնաժամի դեմ պայքարի գործիքներին, ապա, նրա խոսքերով, գրեթե բոլոր երկրներն ունեն իրենց ծրագրերը բացի Ուկրաինայից ու Մոլդովայից, ինչը պայմանավորված է նրանով, որ «ճգնաժամը համակարգային է, և երբ խնդիրները գլոբալ են, ապա դրանց դեմ պայքարել էլ հնարավոր կլինի միայն համակարգված»։

Համագործակցության երկրներում միջինը, համաձայն ԱՊՀ Վիճակագրական կոմիտեի հրապարակած տվյալների, համախառն ներքին արդյունքը 2009 թվականի հունվար-մայիսին կրճատվել է 9 տոկոսով 2008 թվականի նույն ցուցանիշի համեմատ։ Միաժամանակ հունվար-մայիսին Հայաստանում ՀՆԱ-ն (մշտական գներով) կրճատվել է 15,7 տոկոսով, Ռուսաստանում (ըստ տնտեսական գործունեության բազային տեսակների)՝ 13,6 տոկոսով։

Միաժամանակ 2009 թվականի առաջին եռամսյակում` 2008 թվականի առաջին եռամսյակի համեմատ, Մոլդովայում գրանցվել է 6,9 տոկոս տնտեսական անկում։ 2008 թվականին` 2007 թվականի համեմատ, Վրաստանում և Ուկրաինայում արձանագրվել է ՀՆԱ աճ 2,1 տոկոսով։  -0-