ԵՐԵՎԱՆ, 6 հուլիսի. /Նովոստի-Արմենիա/. Հայ ժողովուրդը հիասթափվել է ընդդիմությունից, կարծում է իշխող Հայաստանի Հանրապետական կուսակցության խորհրդարանական խմբակցության անդամ Գագիկ Մելիքյանը:
«Մինչև ընդդիմության վերջին, արտահերթ հանրահավաքը, ես կարծիք էի հայտնել, որ դա կլինի «հիասթափության հանրահավաք»: Ցավոք, այդպես էլ եղավ: Ընդդիմությունն ինքն իր գործողություններով հասավ նրան, որ ժողովուրդը հիասթափվեց ընդդիմությունից, չնայած ընդդիմության առաջնորդները նախկինի պես հայտարարում են, որ ժողովուրդը կանգնած է նրանց կողքին», - երկուշաբթի մամուլի ասուլիսի ժամանակ ասաց Մելիքյանը:
Նրա խոսքերով, ուժեղ պետության կայացման համար անհրաժեշտ է ուժեղ ընդդիմություն, որը Հայաստանում բացակայում է: Պատգամավորը նաև նշեց, որ ընդդիմությունը երկրում հայտարարված համաներումը սեփական հաջողությունը համարելու որևէ հիմք չունի՝ ավելացնելով, որ համաներումը «հանրապետության նախագահի բարի կամքի դրսևորումն էր»:
ՀՀ խորհրդարանը հունիսի 19-ին անցկացված արտահերթ նիստում հավանություն էր տվել ՀՀ նախագահ Սերժ Սարգսյանի՝ համաներում հայտարարելու առաջարկությանը: Հայտարարված համաներման համաձայն, պատժից լիովին ազատվում են, մասնավորապես առավելագույնը երեք տարի ժամկետով ազատությունից զրկելու հետ կապված պատիժների դատապարտված անձինք, այն անձինք, որոնց նկատմամբ պատիժը պայմանականորեն չի կիրառվել կամ պատժի կրումը հետաձգվել է, ինչպես նաև ազատությունից զրկելու հետ չկապված պատիժների դատապարտված անձինք:
Համաներումը տարածվում է 2008թ. մարտի 1-2-ը Երևանում քաղաքում տեղի ունեցած իրադարձությունների առնչությամբ հանցագործություն կատարած անձանց վրա, որոնց հինգ տարի ազատազրկում է սպառնում: Համաներումը տարածվում է նաև հետախուզման մեջ գտնվող անձանց վրա, ովքեր կհանձնվեն իրավապահ մարմիններին մինչև 2009թ.-ի հուլիսի 31-ը:
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։-0-
