Հայկական կազմակերպությունը կոչ է անում քաղբանտարկյալ ճանաչել Վրաստանում գտնվող հայ ակտիվիստին
«Երկիր» հասարակական կազմակերպությունների միությունը կոչ է անում Վրաստանի մարդու իրավունքների պաշտպանին, միջազգային կառույցներին ու իրավապաշտպան կազմակերպություններին հայ քաղաքական ակտիվիստ, «Միասնական Ջավախք» շարժման առաջնորդ Վահագն Չախալյանին քաղբանտարկյալ ճանաչել, ասվում է Միության՝ «Նովոստի-Արմենիա» գործակալությանը տրամադրած հայտարարության մեջ:
Ջավախքը Հայաստանի սահմանին տեղակայված հայաբնակ շրջան է Վրաստանում:
Վահագն Չախալյանը 2009 թ.-ի ապրիլի 7-ին Վրաստանի Ախալցխայի շրջանային դատարանի կողմից դատապարտվել է 10 տարվա ազատազրկման: Մի շարք հայկական կազմակերպություններ նրա դեմ հարուցված մեղադրանքները շինծու են համարում:
«Երկիր» միությունը կոչ է անում համապատասխան գնահատական տալ Վահագն Չախալյանի իրավունքների աղաղակող խախտումների փաստերին, համապատասխան ճնշում գործադրել վրացական իշխանությունների վրա` Վահագն Չախալյանի արդար և անկողմնակալ դատավարության իրավունքը ապահովելու ուղղությամբ»,- ասվում է հայտարարության մեջ:
Կազմակերպությունում ընդգծեցին, որ վրացական իշխանությունները փոփոխություններ են մտցնում երկրի ՔԿՕ-ում ֆրանսիացի փաստաբանի գրանցումը որպես Չախալյանի իրավապաշտպանի մերժելու համար: Համաձայն Վրաստանի քրեական դատավարության օրենսգրքի փոփոխությունների, որոնք ուժի մեջ են մտել 2009թ. հունիսի 24-ին, օտարերկրյա փաստաբաններին այլևս չի թույլատրվում երկրի տարածքում իրականացնել Վրաստանի քաղաքացու պաշտպանությունը (Վրաստանի ՔԴՕ, հոդված 78, կետ 5):
«Քրեական-դատավարության օրենսգրքի մեջ փոփոխություններ կատարելը ժամանակագրական առումով համընկնում է ֆրանսիացի փաստաբանի գրանցման հարցի շուրջ ծավալված գործընթացների հետ, ինչը չի կարող պատահականություն լինել: Փաստորեն, նշված քայլով վրացական իշխանությունները հիմք են ստեղծել ֆրանսիացի փաստաբանի գրանցումը մերժելու իրենց հակաօրինական որոշման դեմ հայցն առանց բավարարման թողնելու համար, այն հիմնավորմամբ, թե տեղի է ունեցել օրենքի փոփոխություն»,- կարծում են «Երկիր» միությունում:
Ինչպես ասված է հայտարարության մեջ, Վահագն Չախալյանի իրավունքների խախտումը պետության բարձրագույն օրենսդիր օղակի գործադրման միջոցով «օրինականացնելու» այս գործողությամբ վրացական իշխանությունները հերթական անգամ փաստում են, որ ջավախահայ քաղաքական ակտիվիստի նկատմամբ ընթացող դատավարությունը շինծու մեղադրանքների վրա հիմնված քաղաքական պատվեր է, որն ավարտին հասցնելու համար նրանք ոչ միայն պատրաստ են ոտնահարել արդար և անկողմնակալ դատավարության հիմնարար իրավունքը, այլ նաև իրենց հայեցողությամբ վերաձևել իրենց երկրի օրենսդրությունը:-0-
