Համաշխարհային բանկը 60 մլն դոլար վարկ կտրամադրի Հայաստանին First Development Policy Operation ծրագրի շրջանակներում

Համաշխարհային բանկի տնօրենների խորհուրդը հաստատեց Հայաստանին 60 մլն դոլար վարկ տրամադրելու որոշումը Զարգացման քաղաքականության երեք նմանատիպ օպերացիաներից առաջինի (First Development Policy Operation – DPO-1) շրջանակներում, որոնք կտրամադրվեն Հայաստանին երեք տարվա ընթացքում, ասաց Համաշխարհային բանկի երևանյան գրասենյակի տնօրեն Արիստոմենե Վարուդակիսը։

Վարկը Հայաստանին կտրամադրվի 0,75 տոկոս տոկոսադրույքով, 20 տարի մարման ժամկետով 10-ամյա արտոնյալ ժամանակահատվածով։ «Հաջորդ երկու տարիներին կմշակվեն համապատասխան ծրագրեր և կհստակեցվի դրանց արժեքը, սակայն բոլոր երեք DPO ընդհանուր գումարը պետք է սահմանափակվի 100 մլն ԱՄՆ դոլարի սահմաններում»,- ուրբաթ լրագրողներին ասաց Վարուդակիսը։

ՀԲ երևանյան գրասենյակի ղեկավարի խոսքերով, DPO-1-ը հետապնդում է երկու հիմնական նպատակ՝ համաշխարհային ճգնաժամի ազդեցության մեղմացումը բնակչության անապահով շերտերի համար, ինչպես նաև Հայաստանին աջակցության ցուցաբերումը հետճգնաժամային ժամանակահատվածում տնտեսական աճի ապահովման գործում երկրի մրցունակության բարելավման և տնտեսության բոլոր ոլորտներում ներդրումների ներգրավման միջոցով։

Այս կապակցությամբ Վարուդակիսը պարզաբանեց, որ անապահով խավերին աջակցության գծով նախատեսվում է մեծացնել սոցապահովման ծրագրերին, այդ թվում՝ աղքատության ընտանեկան նպաստներին, թոշակային համակարգին և սոցապահովման ցանցին ուղղվող ֆինանսական միջոցների ծավալը։

«Հայաստանի մրցունակության բարձրացման միջոցով տնտեսական աճի արագ տեմպերի վերականգնումն ապահովելու համար DPO-1-ը կուղղվի, մասնավորապես, բիզնեսի կազմակերպման գծով ծախսերի կրճատմանը և Հայաստանի Պետեկամուտների կոմիտեի հետևողական արդիականացմանը»,- նշեց Վարուդակիսը։

1992 թվականից Համաշխարհային բանկը Հայաստանին տրամադրել է 1,25 մլրդ դոլարի վարկեր։ -0-