Հայաստանում Ուկրաինայի դեսպանատունը չորեքշաբթի հայտարարություն է արել, որում հերքվում են Դնեպրոպետրովսկի մարզի Մարգանեց քաղաքում հայերի հետ կապված ազգամիջյան հակամարտության առկայության մասին լուրերը:
Ուկրաինայի դեսպանատունը տրամադրեց այդ երկրի ՆԳՆ պաշտոնական տեղեկատվությունը՝ կապված հայկական որոշ ԶԼՄ-ների հրապարակումներին, որոնցում, ուկրաինացի դիվանագետների կարծիքով, Ուկրաինայի Դնեպրոպետրովսկի մարզի Մարգանեց քաղաքում տեղի ունեցած իրադարձությունները լուսաբանված են հատուկ միտումով:
Տեղեկատվության համաձայն, 2009 թ.-ի հունիսի 29-ին, Մարգանեցի միլիցիայի քաղաքային բաժին ստացվել է հաղորդագրություն այն մասին, որ տեղական սրճարաններից մեկում կռիվ է ծագել: Անհապաղ դեպքի վայր է ժամանել քննիչ-օպերատիվ խումբը:
Ինչպես նշվում է հաղորդագրության մեջ, պարզվել է, որ սրճարանում հանգստացել են տեղի բնակիչների երկու խումբ, որոնց կազմում եղել են նաև Ուկրաինայի հայազգի բնակիչներ: Հանկարծ նրանց միջև կենցաղային բնույթի վեճ է ծագել, որը կամաց-կամաց կռվի է վերածվել:
«Պարեկային ծառայության տեսուչ միլիցիայի 22-ամյա սերժանտ Սերգեյ Բոնդարենկոն, ով ծառայողական պարտականությունները կատարելիս չի եղել, փորձել է հանգստացնել վիճաբանող կողմերին: Խառնաշփոթի ժամանակ հայազգի մասնակիցը դանակով մահացու վնասվածք է հասցրել միլիցիայի աշխատակցին ուղիղ սրտի մեջ: Սպանության փաստով հարուցվել է քրեական գործ Ուկրաինայի ՔՕ 115 հոդվածի առաջին մասով «Դիտավորյալ սպանություն»/»,- ասվում է հաղորդագրության մեջ:
Դնեպրոպետրովսկի մարզում Ուկրաինայի ՆԳՆԳՎ պետ Անատոլի Նաումենկոյի խոսքերով, կռվի երեք մասնակիցները, որոնց թվում նաև մահացու վնասվածք հասցրած անձը, տեղափոխվել են հիվանդանոց:
«Միաժամանակ բժշկական հաստատության շենքի մոտ են ժամանել տուժածների հարազատներն ու ծանոթները, որոնց միջև ծագել է հերթական վեճը, որն ուղեկցվել է խուլիգանական դրսևորումներով: Մասնավորապես, վնասվել է 5 մեքենա»- ասել է Նաումենկոն:
Հաղորդագրության համաձայն, հասարակական կարգի խմբակային խախտումները կասեցնելու նպատակով, իրավապահ մարմինները համապատասխան նախազգուշական-կանխարգելիչ միջոցառումներ են ձեռնարկում:
«Հիմա միջազգային հիմքով կոնֆլիկտային իրավիճակ չկա: Այդ իրավիճակը հորինում են նրանք, ում դա ձեռնտու է: Մենք զրուցել ենք հայկական համայնքի ղեկավարության հետ: Հայկական համայնքի բնակավայրում տիրող իրավիճակը հսկում են միլիցիայի ստորաբաժանումները: Մենք պարզել ենք այդ միջադեպի բոլոր մասնակիցներին, նրանք գտնվում են Միլիցիայի Մարգանեցի քաղաքային բաժանմունքում»,- հայտնել է Նաումենկոն: -0-
